Америка дөләт мәҗлиси әзалири хилтон ширкитиниң хотәндә меһманхана қурушни тохтитишини тәләп қилған

Мухбиримиз әркин
2021-07-30
Share

Америка дөләт мәҗлисиниң бир комитети хилтон ширкитиниң хотәндики бир мәсчитниң орниға селиниватқан меһманхана қурулушини тохтитишини тәләп қилған.

Ройтерс агентлиқиниң хәвәр қилишичә, америка дөләт мәҗлиси хитай ишлири комитетиниң қош рәислиридин кеңәш палата әзаси җеф меркилей билән авам палата әзаси җеймис микговерин 29-июл хилтон ширкитиниң мудири вә ‍иҗраийә директори кристофер насеттаға мәктуп йезип, бу тәләптә болған.

Улар мәктупта, хотәндә селиниватқан хилтон хамптон меһманхасиниң 2018-йили чеқиветилгән бир мәсчитниң орниға қурулуватқанлиқиға даир хәвәрләрдин әндишә қилғанлиқини билдүргән.

Йеқинда әнглийә мухбирлири хотәнни зиярәт қилип, хотән шәһәр мәркизидә селиниватқан хилтон хамптон меһманханисиниң орниниң әсли бир мәсчит икәнлики, бу мәсчитниң 2018-йили чеқиветилгәнликини дәлиллигән. Биз илгири хилтон ширкити билән алақиләшкәндә уларниң бир баянатчиси "вәқәдин хәвәрдар" икәнликини билдүргән, әмма илгириләп пикир билдүрүшни рәт қилғаниди.

Ройтерс агентлиқиниң ейтишичә, мәктупта хилтон меһманханиси селиниватқан "бу орун хитай һөкүмитиниң ш у а р дики уйғур диний вә мәдәнийәт мираслириға кәң көләмлик бузғунчилиқ қилиш һәрикити, даириләрниң уйғур диний вә мәдәнийәт ипадилирини йоқитиш урунушиға вәкиллик қилиду" дейилгән. Мәктупта йәнә хитайниң уйғур диний вә мәдәнийитигә бузғунчилиқ қилиши америка һөкүмитиниң уйғурларға қарита "ирқий қирғинчилиқ" елип бериливатқанлиқини бекитишигә түрткә болғанлиқи ейтилған. Мәлум болушичә, бу мәктупқа йәнә кеңәш палата әзаси марку рубийо билән авам палата әзаси крситофер симисму имза қойған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт