«Авангарт мулазимәт гуруһи» ниң қәшқәрдә мәшиқ базиси қурғанлиқи ашкариланди

Мухбиримиз әркин
2018-05-07
Елхәт
Пикир
Share
Принт

«Вшингтон почтиси гезити» йеқинда хоңкоңни база қилған «авангарт мулазимәт гуруһи» ниң қәшқәрдә мәшиқ базиси қуруп, хитайға бихәтәрлик хадимлирини тәрбийәләп бериватқанлиқини ашкарилиди.

«Авангарт мулазимәт гуруһи» ирақ уруши дәвридә нами чиққан «қара су» ширкитиниң қурғучиси ерик принс тәрипидин тәшкил қилинған. «Вашингтон почтиси гезити» ниң илгири сүрүшичә, қәшқәрниң җәнубидики мәлум бир җайда қурулған бу мәшиқ базиси бейҗиңдики хәлқара бихәтәрлик вә мудапиә мәктипигә қарашлиқ икән.

Хәвәрдә, униң хитайдики тунҗи хусусий бихәтәрлик ширкити икәнлики, бейҗиңдики хәлқара бихәтәрлик вә мудапиә мәктипиниң қәшқәрдин башқа йәнә йүннән қатарлиқ җайлардиму мәшиқ базиси барлиқини, һазир бу мәктәпниң 25% пай чекини «авангарт мулазимәт гуруһи» ниң контрол қилидиғанлиқини билдүргән.

Хәвәрдә баян қилинишичә, 2014‏-йили күнмиң пойиз истансисида йүз бәргән пичақлиқ һуҗумдин кейин бу мәктәпниң нишани террорлуққа қарши хадимларни тәрбийәләшкә буралған. Хәвәрдә агангарт мулазимәт гуруһи» ниң уйғур районида база қурушиниң кишилик һоқуқ паалийәтчилирини биарам қиливатқанлиқи илгири сүргән. «Вашингтон почтиси гезити» ниң қәйт қилишичә, хәлқара кәчүрүм тәшкилатиниң хадими николас бекулин «авангарт мулазимәт гуруһи» ниң уйғур районида мәшиқ базиси қуруши бу ширкәтниң хитай һөкүмити билән болған алаһидә йеқин мунасивитини көрситидиғанлиқини тәкитлигән.

У, «бу райондики бихәтәрлик вәзиписи хитайниң чеграсини қоғдаш вә аз санлиқ милләтләрни ассимилятсийә қилишни қулайлаштурмақ» дегән. Хәвәрдә йәнә, америкидики уйғур паалийәтчи рошән аббасниң сөзи нәқил кәлтүрилгән. У, «америка ширкитиниң хадимлирини әвәтип, хитайниң уйғур мәдәнийитини йоқитишини қоллиши һәқиқәтән кишини әпсусландуриду» дегән.

«Вашингтон почтиси гезити» ниң илгири сүрүшичә, ерик принсниң һәрикити америка һөкүмитидики алақидар әмәлдарларни биарам қилишқа башлиған. Хәвәрдә, униң һәрикити йәнә америкиниң мәнпәәтигә уйғунму-әмәсму?, дегән соалларни пәйда қилғанлиқи, лекин ерик принсниң бу һәқтики гуманларни рәт қилғанлиқини билдүргән.

Пикирләр (0)
Share
Толуқ бәт