14 Yashliq Uyghur naxsha cholpini rusiyede zilzile peyda qildi

Muxbirimiz erkin
2018-03-19
Élxet
Pikir
Share
Print

Rusiyening sankt-pétérburg shehiride yashaydighan 14 yashliq Uyghur naxsha cholpini aqmel xojaniyazof yéqinda rusiye 1‏-téléwiziye qanilining "Rusiye balilar awazi" talant musabiqiside naxsha éytip, bahalighuchilar we tamashibinlarda zor tesir qozghidi.

Aqmel niyazofning talanti ijtima'iy axbarat wasitiliride keng tarqilip, rusiye we musteqil döletler hemdostluqidiki ellerde we muhajirettiki Uyghurla r arisida zilzile peyda qildi.

Közetküchiler aqmel niyazofni ataqliq merhum naxshisi murat nasiroftin kéyinki rus tilida naxsha éytip dang chiqarghusi yene bir Uyghur naxsha cholpini bolup qélishi mumkin, dep bahalimaqta.

Melum bolushiche, aqmel xojaniyazofning ata-anisi türkmenistanning bayram aliy rayonida olturushluq Uyghurlardin bolup, ular hazir rusiyening sankt-pétérburg shehiride yashaydiken.

Aqmel xojaniyazofning akisi jamalidin xojaniyazofmu rusiyede tonulghan putbol cholpanlirining biri bolup, u hazir daniyediki bir putbol kulubida top oynaydu. Jamalidin xojaniyazof ilgiri rusiyening "Zénit" yash-ösmürler komandisida top oynap nam chiqarghan.

Melum bolushiche, aqmel xojaniyazofning ata-bowisi 1883‏-yillardiki köch-köchlerde ilidin türkmenistanning bayram aliy rayonigha köchüp bérip olturaqliship qalghan Uyghurlargha tutushidiken.

1871‏-Yili char rusiye ili sultanliqini aghdurup, 1883‏-yili ilini manjulargha ötküzüp bergende zor bir türküm Uyghurlar ghuljini tashlap, rusiye kontrolluqidiki yettisu tereplerge köchidu. Bu jeryanda bir qanche yüz a'ililik Uyghur char padishah hökümitining wedisige ishinip, türkmenistanning merwi shehiri etrapidiki bayram aliy rayonigha köchüp bérip olturaqliship qalghan idi.

Rusiye axbarat wasitilirining xewer qilishiche, bahalighuchilar aqmel xojaniyazofni "Rusiye balilar awazi" ning hel qilghuch musabiqisige qatnashqan ösmür naxshichilar ichidiki awaz we orundash sen'iti eng yaxshi bala naxshichi, dep baha bergen. U, in'gliz tilida naxsha orundighan idi.

Toluq bet