Найки билән кокаколаниң “уйғур мәҗбурий әмгәкини чәкләш қануни” ға қарши һәрикәт қилғанлиқи илгири сүрүлмәктә

Найки билән кокакола ширкитиниң дәллаларни яллап, америка дөләт мәҗлисидә “уйғур мәҗбурий әмгикини чәкләш қануни” ға қарши паалийәт қилғанлиқи илгири сүрүлди. “ню-йорк вақти гезити” ниң ашкарлишичә, америка дөләт мәҗлисидики хадимлар, вәзийәттин хәвәрдар затлар вә алақидар һөҗҗәтләр бу икки ширкәтниң дәллалларни яллап, америка дөләт мәҗлисидә бу қануниниң мақуллинишиға қарши паалийәт қилқанлиқи, бу қанунни аҗизлаштуруш үчүн һәрикәт қиливатқанлиқини көрситип бәргән.

Мәзкур қанун лайиһәси бу йил 9-айда америка авам палатасида 3 кә қарши 406 аваз билән мақулланған. Нөвәттә бу қанун лайиһәси кеңәш палатасиниң мақуллишини күтүп турған иди. Лекин “ню-йорк вақти гезити” ниң билдүрүшичә, бу қанун лайиһәси найки вә кока-коладәк чоң ширкәтләр, америка тиҗарәт уюшмисидәк сода гуруппилириниң хрисиға дуч кәлгән. Буниң алдида “вашингтон почтиси” алма ширкитиниң бу қанунға қарши паалийәт қилғанлиқини хәвәр қилған. Бу хәвәр кишилик һоқуқ актиплириниң диққитини қозғиған. 28-Ноябир голландийәлик яш актиплар алма ширкитиниң аместердам шәһридики бир дукини алдида намайиш қилған.

“ню-йорк вақти гезити” ниң тәкитлишичә, кокакола ширкити өзлириниң тәминат зәнҗиридә һәрқандақ шәкилдики мәҗбурий әмгәкни чәкләйдиғанлиқи, 2019-йили шинҗаң тунхедики тәминат зәнҗириниң “мувәппиқийәтлик тәкшүрүлгәнлики” ни илгири сүргән. Найки ширкити болса өзлириниң “уйғур мәҗбурий әмгикини чәкләш қануни” ға қарши һәрикәт қилғанлиқини рәт қилип, дөләт мәҗлисидики хадимлар билән мәҗбури әмгәкниң алдини елиш, кишилик һоқуқни қоғдаш тоғрисида “иҗаби музакирә” елип барғанлиқини билдүргән.