Гәнсулуқ өсмүрниң торда учур тарқатқанлиқи сәвәблик мәктәптин һәйдилиши муназирә қозғиди

Бу йил 9-ай мәзгилидә “торда өсәк сөз тарқатти” дегән җинайәт билән әйиблинип тутқун қилинип, җәмийәтниң бесими билән қоюп берилгән, толуқсиз оттура мәктәпниң 3-йиллиқ оқуғучиси, гәнсулуқ өсмүр яң хуй, 18-ноябир дүшәнбә күни мәктәптин һәйдәлгән.

Яң хуйниң аилисидикиләр бу хәвәрни хәлқара мәтбуатларға ашкарилиғандин кейин, тор бекәтлиридики муназириләрдә, “15 яшлиқ өсмүрниң торға учур йоллиғанлиқи үчүнла, мәктәптин һәйдилиштәк еғир җазаға учриши қанунсизлиқ!” дәп әйибләнди.

Яң хуй бу йил 12-сентәбир күни, юрти гәнсу өлкисиниң җаң җачүән базирида тепилған намәлум әрниң җәсити тоғрилиқ, сақчилар ениқ мәлумат бәрмәй туруп, тор бекәтлиридә өз гуманини ашкара елан қилған. Бу сәвәбтин у әйни чағда йеңидин қарардин өткән бәлгилимигә асасән тунҗи қетим тутқун қилинған. Кейин даириләр җәмийәттин кәлгән еғир бесим сәвәблик яң хуйни қанун бойичә җазалаш буйруқини әмәлдин қалдурған иди.

Яң хуй оқуватқан мәктәп даирилири яң хуйни мәктәптин һәйдәш буйруқи чүшүрүшигә, юқиридин кәлгән бесим сәвәб болғанлиқини билдүргән. Әмма яң хуй вә униң аилисидикиләр давамлиқ әрз қилидиғанлиқини билдүрүп, мәктәптин һәйдәш җазаси берилишиниң адаләтсиз қарар болғанлиқини тәкитлигән.