Iqtisadshunaslar xitayning öy-mülük kirizisini ongshishigha uzun yil kétidighanliqini bildürgen

Washin'gtondin muxbirimiz irade teyyarlidi
2024.01.04

“GROW” namliq meblegh sélish guruppisining bash iqtisadshunasi xaw xongning CNBC téliwiziyesi muxbirigha déyishiche, “Xitayda hazir zapas bar bolghan quruq öylerni sétip bolushqa texminen ikki yilche waqit ketse, qurulushi téxi dawam qiliwatqan turalghu öy zapisini sétip bolushqa 10 yildin köprek waqit kétishi mumkinken.”

Xitayda bir mehel qattiq güllen'gen öy-mülük sodisi 2020-yildin bashlap kasatchiliqqa uchrighan we öy-mülük tereqqiyat sodigerliri shiddet bilen qerz krizisigha pétip qalghan. Iqtisadshunas xaw xong, xitay iqtisadining texminen üchtin birini igileydighan bu saheni eslige keltürüsh üchün nurghun yillar kétishi mumkinlikini éytqan.

Xitayning öy-mülük sahesidiki kirizisning chongqurlishishi xitayda chet el meblighining tarixtiki eng töwen sewiyege chüshüp qélishi, istémalning kasatlishishi we netijide ishsizliqtin ibaret zenjirsiman aqiwetlerni keltürüp chiqarmaqtiken.

BBC Radiyo-téléwiziye torining bildürüshiche, xitayda aliy mektep püttürgen yashlar arisidiki ishsizliq intayin éghir bolup, nurghun yashlar oqughan kespige layiq xizmet tapalmaydighan, ata-aniliri bilen bille turup jan baqidighan yaki kespi we unwanigha mas kelmeydighan xizmetlerni qilishtek weziyetke duchar bolghan.

Uningda déyilishiche, hökümet da'iriliri 2023-yili 8-ayda élan qilghan resmiy sanliq melumatlargha qarighanda, xitaydiki 16 yashtin 24 yashqiche bolghan yashlarning beshtin bir qismidin artuqi ishsiz bolup, hökümet da'iriliri shuningdin kéyin yashlarning ishsizliq nisbitini élan qilip baqmighan. Oksford uniwérsitétining insanshunasliq proféssori shyang byaw BBC gha qilghan sözide “Xitaydiki yashlarning pütkül hayati tiriship oqusa, tiriship ishlise, andin yaxshi ma'ashliq xizmetke we turmushqa ige bolghili bolidu, deydighan qarash üstige qurulghan, biraq ular bu wedining emdi kargha kelmeydighanliqini bayqidi” dégen.

Xewerde déyishiche, xitaydiki yashlar yüzlishiwatqan kirizis xitay dölet re'isi shi jinping teshebbusidiki “Xitay chüshi” ge jiddiy xiris peyda qilmaqtiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.