Pakistanning asasliq gézitliridin “Téz yollanma munbiri” xitayning “Shinjang teshwiqati” ni qilish bilen eyiblendi

Pakistanning asasliq gézitliridin “Téz yollanma munbiri” géziti (Express Tribune) yéqinda arqa-arqidin Uyghur diyarida xushalliq we diniy erkinlikning höküm sürüwatqanliqi ilgiri sürülgen ikki parche maqale élan qilghan. Nöwette, “Téz yollanma munbiri” géziti bu xil maqaliler arqiliq xitayning “Shinjang teshwiqati” ni élip bérish we öz özini mesxire qilish bilen eyiblenmekte. Yawropada chiqidighan “Zimistan” tori 17-aprél mexsus maqale élan qilip, “Téz yollanma munbiri” ning “Nyu-york waqti” bilen hemkarliq munasiwiti bolghan birdin bir pakistan géziti ikenliki, pakistan bilen xitay ittipaqdash bolsimu, emma pakistanda nopuzluq metbu'at epkari, dep qarilidighan bu gézitning “Béyjingni xushal qilishining bir chéki bolushi kérekliki” ni bildürgen.

Melum bolushiche, “Téz yollanma munbiri” géziti yéqinda “Heywetlik shinjang: qedimiki we zamaniwi yipek yolidiki mislisiz güllinish” mawzuluq bir maqale élan qilghan. Maqalini xitayning karachida turushluq bash konsuli qelemge alghan bolsimu, emma uninggha chüshenche bérilmigen. “Zimistan” tori, maqalida “Shinjangni bashqilardin perqlendüridighini diniy erkinlik we uning diniy güllinishi” dep körsitilgenliki, uning rayondiki meschitlerni chéqish we “Xitaychilashturush” ni “Diniy güllinish” dep hésablighanliqini bildürgen. “Zimistan” torining qeyt qilishiche, “Her qaysi dölet parlaméntlirining bilet tashlap, shinjangdiki Uyghur we bashqa türkiy xelqlerde yüz bériwatqan ishlarni irqiy qirghinchiliq, dep békitken, b d t ning doklatida xitayning bu rayonda ‛insaniyetke qarshi jinayet‚ sadir qiliwatqan bolushi mumkin, dep xulase chiqarghan bolsimu, emma pakistan gézitining bu rayonda “Xushalliq” höküm sürüwatqanliqini ilgiri sürüshi hem külkilik hem bizar qilarliq iken. “Zimistan” tori, buning xitay bash konsuli we pakistan “Téz yollanma munbiri” géziti oynighan tunji oyun emeslikini, bu gézitning bu yil 1-aydimu xitay bash konsulining yene bir maqalisini élan qilghanliqi, shunga “Nyu-york waqti” géziti özining “Téz yollanma munbiri” bilen bolghan hemkarliqini qayta oylishishini telep qilghan.