Хәлқара кишилик һоқуқ тәшкилатлири «қарақаш һөҗҗәтлири» гә инкас билдүрди

Мухбиримиз әркин
2020-02-21
Елхәт
Пикир
Share
Принт

17‏-Феврал күни хәлқара таратқуларда ашкарлинип, дуняда зор ғулғула қозғиған «қарақаш һөҗҗәтлири» кишилик һоқуқ тәшкилатлириниң күчлүк инкасини қозғимақта.

Германийәдики «тәһдит астидики хәлқләр җәмийити» баянат елан қилип, германийә вә явропа иттипақиниң «бу җинайәттә җавапкарлиқи бар шәхсләр» гә имбарго қоюшини тәләп қилған. Мәзкур тәшкилатниң баянатида тәктилишичә, «германийә вә явропа иттипақи хитай-явропа башлиқлар йиғинида униң истиратегийәлик шерики болған хитайниң инсанийәткә қарши җинайитини һәл қилиши, бу ишни қошумчә тилға елип қоюпла өтүп кәтмәслики керәк» икән.

Баянатта мәзкур тәшкилатниң директори улрех делиусниң сөзи нәқил кәлтүрүлүп: «бу җинайәттә җавабкарлиқи бар шәхсләрниң явропаға киришигә йол қоюлмаслиқи шундақла германийә ширкәтлири өзлириниң шинҗаңдики паалийәтлирини қайта көздин кәчүрүши керәк» дейилгән. Бу нөвәтлик явропа-хитай башлиқлар йиғини бу йил сентәбирдә гермнаийәниң лайпзиг шәһридә өткүзүлидикән. 

«Тәһдит астидики хәлқләр җәмийити» ниң билдүрүшичә, бу йиғинда явропа иттипақи «өзиниң қиммәт қаршида чиң туруп, рәңгини намайән қилиши керәк» икән. Шуниң билән бир вақитта йәнә хәлқара кәчүрүм тәшкилати мунасивәтлик һөкүмәтләрниң келәр һәптидики б д т йиғинида б д т кишилик һоқуқ али комиссариниң уйғур районида мустәқил тәкшүрүш елип беришини қоллишини тәләп қилған. Бу пикирни мәзкур тәшкилатниң али дәриҗилик тәтқиқатчиси мая ваң 20‏-феврал елан қилған бу һәқтики мақалисидә оттуриға қойған. У «қарақаш һөҗҗәтлири» хитайниң шинҗаңдики қорқунчлуқ қилмишлирини техиму көп дәлилләр билән тәминлигәнликини билдүрүп: «һәр қайси дөләтләрниң буниңда җавапкарлиқи бар чен чүәнгодәк әмәлдарларға имбарго йүргүзүши керәк» ликини билдүргән. Униң тәктилишичә, бу арқилиқ «бейҗиңға униң шинҗаңдики бастурушиниң җавапкарлиқтин қечип қутулалмайдиғанлиқини билдүрүп қоюши керәк,» икән.

Пикирләр (0)
Share
Толуқ бәт