Қәшқәр районидики порт содисиниң ашқанлиқи гуман қозғимақта

Мухбиримиз әзиз
2022.11.01

Хитай һөкүмитиниң башқурушидики “хитай хәвәр тори” ниң 1-ноябирдики хәвиридә ейтилишичә, 2022-йили сентәбиргә қәдәр қәшқәр универсал порт райониниң импорт-експорт сода миқдари 16 милярд сом (2.2 Милярд америка доллири) дин ашқан болуп, өткән йилқи охшаш мәзгилдикидин 11 һәссә көпәйгән.

Хәвәрдә ейтилишичә, қәшқәрдики “бәш сода еғизи сәккиз дөләткә тутишидиған” болуп, явро-асия қуруқлуқиға биваситә тутишиштәк әвзәллики түпәйлидин зор җәлпкарлиққа игә болған. Шуниңдәк бир қатар “етибар бериш” сиясәтлири түпәйлидин нәччә йүз хитай ширкити бу җайда иш башлиған. Йәнә келип хитай һөкүмитиниң “бир бәлвағ бир йол қурулуши” ға бағлинишлиқ болған бир қатар сода паалийәтлири қәшқәр арқилиқ ишқа ашқан.

Әмма хитай һөкүмитиниң уйғур дияридики қирғинчилиқи һәмдә уйғурларни мәҗбурий әмгәккә селиш қилмишлири түпәйлидин америка башчилиқидики ғәрб дөләтлири хитайға қарита бәзи иқтисадий җаза тәдбирлирини елан қилған һәмдә иҗра қилишқа башлиғаниди. Шу сәвәбтин хитайниң ғәрб дунясиға тавар експорт қилиши еғир чәклимигә вә тәсиргә учриғаниди.

Америка һөкүмитидин кейин явропа иттипақиму 2022-йили сентәбирдә бу һәқтә тәклип сунуп “биз уйғур районидики мәҗбурий әмгәк мәһсулатлириниң явропа базириға киришини чәклишимиз лазим” дегәниди.

Йеқиндин буян хитай һөкүмитиниң мушу хилдики тәшвиқатлири күчийиватқан болуп, улар уйғур дияриниң ташқи сода експорт миқдариниң “тез сүрәттә ешип меңиватқанлиқи” һәққидики учурларни көпләп тарқитишқа башлиғаниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.