Nurmemet ismayil qur'an satqanliqi üchün tutqun qilin'ghan

Uyghurbiz torining xewiridin melum bolushiche, 23 yashliq nurmemet ismayil héytka meschiti aldidiki dukinida qur'an satqanliqi üchün,2013 - yili 1 - mart küni tutqun qilinip 50 kündin ashqan bolsimu qoyup bérilmigen.

Uyghurbiz torining nurmemet ismayilning a'ilisidikilerdin igilishiche, 1 - mart küni dukinida tijaret qi'iliwatqan nurmemet ismayil qeshqer sheherlik dölet amanliqini qoghdash saqchiliri teripidin “Qur'an satqan” dégen jinayet artilip élip kétilgen. A'ilisidikiler nurmemetni körgili barghan bolsimu, emma saqchilar nurmemetning délosi tekshürülüwatqanliqini bildürüp, a'ilisidikilerning uni yoqlishigha ruxset qilmighan.

Uyghurlarning bildürüshiche, yéqindin buyan qeshqer, xoten qatarliq jaylarda da'iriler uqturush chiqirip, shexsilerning qur'ani kerim qatarliq diniy kitablarni sétishini cheklen'gen. Emma Uyghur aptonom rayoni da'iriliri bu yil kirishi bilen qur'an kerimning yéngi terjime nusxisini neshr qilip bazargha salghan bolup, da'irilerning bir tereptin qur'an kerimning yéngi terjime nusxisini ashkara sétishi, yene bir tereptin qur'an kerimning shexsler teripidin sétilishini cheklishi Uyghurlar weziyitini we xitaydiki diniy étiqad cheklimilirini yéqindin közitiwatqan xelq'ara kishilik hoquq teshkilatlirining diqqitini qozghimaqta.