Rusiye bilen xitay shimaliy koriyige herbiy arilishishqa qarshi turdi

Rusiye bilen xitay tashqi ishlar ministirliqi jüme küni moskwada körüshüp, chet'elning yéqinda yadro siniqi élip barghan shimaliy koriyige herbiy arilishishigha qarshi turidighanliqini bildürdi.

Rusiye tashqi ishlar ministiri sérgéy lawrof bilen xitay tashqi ishlar ministiri yang jyéchi yadro siniqini tenqid qilghan bolsimu, biraq shimaliy koriyige qarshi her qandaq heriket b d t ning maqulluqini élishi kérek, dégen. Sérgéy lawrof eskertip: weziyetni herbiy arilishishning bahanisi qiliwélishqa yol qoymasliq intayin muhim, dep körsetken.

Shimaliy koriye yéqinda 3‏-qétimliq yadro siniqi ötküzüp, xelq'ara jem'iyetning qattiq tenqidige uchrighan.

Biraq,xitay bilen rusiye xewpsizlik kéngishining ret qilish hoquqidin paydilinip, pyongyanggha qattiq chare qollinishni tosup keldi. Yang jyéchi xitay kompartiyisi bash sékrétari shi jinpingning 3‏-ayda xelq qurultiyi we siyasiy kéngeshning memliketlik yighinini tügitipla, rusiyige qilidighan ziyaritini orunlashturush üchün moskwagha kelgen.

Lawrof yang jyéchi bilen ötküzgen axbarat élan qilish yighinida yene: rusiye bilen xitay ottura sherq, shimaliy afriqa shundaqla süriye, afghanistan, iran yadro mesilisi we bashqa krizislarda ortaq pozitsiyige ige we bu ortaq pozitsiyisini dawamlashturidu, dégen.