Хитайниң тетитқу қатарлиқ сахта йемәкликлири вәһимә яратти

Мухбиримиз меһрибан
2017-01-17
Елхәт
Пикир
Share
Принт

16, 17-январ күнлиридики хитай һөкүмәт хәвәрлиридә, йеқинда хитайда несттл, кнорр қатарлиқ даңлиқ тетитқу маркилири чапланған сахта тетитқу ишләш завутлиридин 50 нәччиси ашкариланғанлиқи хәвәр қилинди.

Тйәнҗиндә чиқидиған «йеңи пайтәхт гезити»ниң 16 -январдики хәвиридә, тйәнҗин шәһәрлик җинхәй райониға җайлашқан 50 кә йеқин тетитқу завутида 10 нәччә йилдин буян санаәттә ишлитилидиған туз, рәң, чиришкә қарши формалин қатарлиқлар ишлитилиш арқилиқ ишләпчиқирилған тетитқуларниң хитай өлкилири, һәтта чәтәлләрдики хитай талла базарлирида сетилғанлиқи ашкариланған, шуниңдәк йиллиқ пайдиси 100 милйон сомдин ашқан бу тетитқу завутлириниң йәнә, яғ ишләш завутлири ишлитип болған кававичин, қәләмпур қатарлиқ хушпурақ дора-дәрмәкләрни йиғивелип қайта қурутуп, талқан қилиш арқилиқ қорумиларда ишлитидиған халтилиқ дора ‏-дәрмәкләрни ишләпчиқирип базарға салғанлиқи тилға елинди.

Әнглийә б б с агентлиқиниң 17-январдики хәвиридә, тазилиқ шараити интайин начар болған бу хил сахта йемәклик завутлириниң хитай өлкә, шәһәрлиридә кәң тарқилишиға сәвәб болған амиллар тилға елинип, хитай һөкүмәт даирилири тәшвиқатида йиллардин буян бу хил сахта йемәклик завутлириға чарә көрүлгәнлики хәвәр қилиниватқан болсиму, әмма йемәклик саһәсигә болған назарити вә тәдбирлиридики бошлуқлар хитайда сахта һәтта зәһәрлик йемәкликләрниң барғанчә көпийишигә сәвәб болғанлиқи илгири сүрүлүп, кишиләр хитайда ишләнгән йемәкликләрни истемал қилишта йемәклик сүпитигә диққәт қилишқа агаһландурулған.

Пикирләр (0)
Share
Толуқ бәт