Ши җинпиң, җу юңкаң қатарлиқ 5 нәпәр чоң әмәлдарни “сиясий суйиқәст” билән әйиблиди

Мухбиримиз меһрибан
2017.01.03

Хитай компартийисиниң орган журнили “әмәлийәт” ниң 1-январдики санида хитай рәиси ши җинпиңниң бултур 27-өктәбир хитай компартийисиниң 18-нөвәтлик 6-омумий йиғинида сөзлигән нутқиниң толуқ текисти берилди.

Ши җинпиңниң нутқида тилға елинған “җу юңкаң, бө шиләй, го бошюң, шү сәйху, лиң җихуа қатарлиқлар пәқәтла иқтисадий җәһәттә парихорлуқ, хиянәтчилик җинайити өткүзүп қалмастин, бәлки сиясий җәһәттә гуруһ уюштуруп, суйиқәст пиланлиған” дегән сөзлири хәлқара таратқуларниң вә вәзийәт анализчилириниң диққитини қозғиди.

Әнглийә б б с агентлиқиниң 3-январ елан қилған “ши җиңпиң компартийиниң әмилидин елип ташланған алий әмәлдарлириниң сиясий суйиқәст пиланлиғанлиқини билдүрди” сәрләвһилик мақалисидә, ши җинпиң бу қетимқи нутқида әмилидин елип ташлинип җазаланған бу бәш нәпәр әмәлдарниң илгирики тәшвиқатларда баян қилинғандәк чириклик сәвәбидин әмәс, бәлки хитай компартийиси ичидики һоқуқ күриши сәвәбидин җазаланғанлиқини етирап қилди” дейилди.

Һалбуки, хитай рәиси ши җинпиң 2013-йили “парихорлуққа зәрбә бериш” һәрикити башлиғандин буян, чәтәлләрдики хитай демократлири таратқулири вә вәзийәт анализчилири, хитайда җазаланған юқири дәриҗилик әмәлдарларниң хитай компартийәси, һөкүмити ичидики җяң земин гуруһи билән ши җинпиң тәрәпдарлири оттурисидики һоқуқ талишиш күриши сәвәбидин җазаланғанлиқи” ни тәкитләп кәлгән иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.