Mexsus shinjang sinipliri üchün “Milletler ittipaqliqi” teshwiqat ömiki teshkillen'gen

Xitay da'iriliri xitay ölkiliridiki “Shinjang sinipliri” da oquwatqan balilargha qaritilghan siyasiy terbiyini kücheytmekte.

Xelq toridin bérilgen xewerdin qarighanda, yéqinda xitay ölkiliride oquwatqan oqughuchilarning idiyiwi siyasiy terbiye xizmitini kücheytish üchün, ma'arip ministirliqi milliy ma'arip mehkimisi, aptonom rayonluq ma'arip komitéti we ma'arip nazariti birlikte mexsus herqaysi ölkilerde oquwatqan “Shinjang sinipi” oqughuchilirigha “Milletler ittipaqliship bir a'ile kishiliridek bolush” terbiyisi bérish üchün bir ömek teshkilligen. Bu ömek aldi bilen xénen'ge yétip bérip u yerdiki “Shinjang toluq ottura sinipliri, ottura derijilik kespiy sinipliri” we alaqidar aliy mekteplerde teshwiq qilish, tekshürüsh xizmitini bashlighan.

Uyghur aptonom rayon da'iriliri bu yil öktebirde ürümchide “Shinjang siniplirining exlaq we siyasiy idiye ma'aripi terbiyilesh kursi” ni échip, “Shinjang sinipi” oqughuchilirigha qaritilghan siyasiy idiyiwi terbiyini kücheytishni, bolupmu dinning mekteplerge singip kirishini qet'iy tosush, radikalliqning aldini élishni telep qilghan shundaqla 3000 neper oqutquchini teshkillep “Shinjang sinipi” oqughuchilirini nazaret qilishqa ewetken idi.

Da'irilerning “Shinjang sinipi” oqughuchilirigha qaritilghan bashqurush, teshwiqat herikitini tuyuqsiz jiddiyleshtürüshi diqqet qozghidi. Közetküchiler buning sewebi heqqide, bu yil 6-ayda gu'angju sheherlik 75‏-ottura mekteptiki “Shinjang sinipi” ning 10 neper oqughuchisining “Térrorluq” qa chétilip tutqun qilin'ghanliqini we shuningdek bashqa weqelerni nezerde tutqanda, “Shinjang sinipi” oqughuchiliridiki omumiy keypiyatning hökümet arzu qilghandek bolmighanliqini mölcherlimekte.