Uyghur aptonom rayonluq siyasiy kéngeshning sabiq mu'awin re'isi parixorluq bilen eyiblen'gen

“Xitay xewerliri tori” ning 12-féwral bergen xewirige qarighanda, Uyghur aptonom rayonluq siyasiy kéngeshning sabiq mu'awin re'isi do wen'guy parixorluq jinayitige chétilip tekshürülgen.

Do wen'guy jyangsuluq xitaylardin bolup, Uyghur élide uzun yil xizmet qilghan؛ u ilgiri kéyin bolup, toli nahiyelik partkomning sékrétari, turpan wilayetlik partkom teshwiqat bölümining bashliqi, aqsu wilayetlik partkomning sékrétari, 2018-yili Uyghur aptonom rayonluq siyasiy kéngeshning mu'awin re'isi bolghan. Xewerde déyilishiche, do wen'guy toli nahiyeside hoquq tutqan waqtidin bashlapla para yep, zor miqdarda bayliq toplighan؛ 2024-yil 3-ayda tekshürülgen؛ 10-ayda kompartiyedin qoghlinip, xizmitidin heydelgen.

Xitay kompartiye ezaliridiki chiriklik do wen'guydimu toluq ipadilen'gen bolup, u kan échish hoquqini bashqilargha bérish, qurulushni höddige bérish, kadir östürüsh jeryanida bashqilardin zor miqdarda pul we bashqa mal-mülüklerni alghan. Yeni “Partiyening muhim siyasetlirini emeliyleshtürüsh” namida pursettin paydilinip nep ündürgen, hoquqpereslerge mensep satqan.

Uyghur élidiki xitay emeldarlirida chiriklik, parixorluq intayin éghir bolup, bu xewerdimu, 2024-yil 1-ayghiche intizam tekshürüsh organliri teripidin 23 mingdin köp emeldarning jinayitining tekshürülgenliki, ötken yildiki oxshash nisbettin 34 pirsentke yéqin ashqanliqi, buning ichide ölke derijilik emeldarning 30 gha yetkenliki melum qilin'ghan.

Radiyomizgha bu heqte söz qilghan xitay weziyiti analizchiliridin xuping, téng biyaw qatarliqlar xitay emeldarlirining hemmiside dégüdek chiriklikning mewjut ikenlikini, peqet emeldarliq sehniside ishi ongdin kelmigen emeldarlarningla mollaq atidighanliqini, omumen, xitay kompartiyesi yoqalmighuche chiriklikning yoqalmaydighanliqini bildürüp kelmekte.