Түркийә, кемиси чөкүп кәткән сүрийәлик мусапирлардин 200 дин артуқ кишини қутқузувалди, 22 җәсәт байқалди

Түркийәдин гиретсийәгә йолға чиққан сүрийәлик қанунсиз көчмәнләр олтурған бир кемә 15-сентәбир күни егә деңизида чөкүп кетип, 22 адәм қаза қилған. Түркийә мәтбуатлириниң хәвәр қилишичә, кемә чөкүш вәқәсидә 4 балини өз ичигә алған 22 киши қаза қилған. Түркийә деңиз қутқузуш әтрәтлири вәқә йүз берип бирқанчә саәт ичидә деңизға чөкүп кетиватқан кемидики сүрийә мусапирлиридин 200 дин көп қанунсиз көчмәнни қутқузувалған.

Өткән һәптидин буян сүрийә мусапирлириниң явропа дөләтлиригә чеграни бузуп қанунсиз көчүш һәрикити башланған болуп, сүрийәдики уруштин қачқан мусапирлар түркүм-түркүмләп һәр хил йоллар арқилиқ һаятлиқ издәп явропа дөләтлиригә қанунсиз көчмән болуп кирмәктә.

Әнглийә б б с агентлиқиниң 15 сентәбирдики хәвиридин мәлум болушичә, венгирийә дүшәнбә күни қанун чиқирип, 15-сентәбир сәһәр саәт 1 дин башлап сербийә-венгирийә чеграсидин қанунсиз киргән сүрийә мусапирлирини сақчилар арқилиқ тосидиғанлиқини билдүргән. Бу қанун иҗра қилиништин илгири тәхминән 9000 сүрийәлик мусапир венгирийә киргән. Хәвәрдә дейилишичә, явропа иттипақи италийә, венгирийә чеграси ичидики 40 миңдин артуқ сүрийәлик мусапирни явропа дөләтлиригә орунлаштуридиғанлиқини билдүргән. Әмма йәнә 120 дин артуқ сүрийәлик мусапир мәсилиси явропа дөләтлириниң бешини қатурған мәсилигә айланған.