Тайланд 17-авғуст партлаштики 2-гумандарниң хитай пуқралиқидики уйғур болуши мумкинликини билдүрди

Мухбиримиз меһрибан
2015-09-01
Share

Ройтерс агентлиқиниң хәвәр қилишичә, тайланд баш министири праюс чан оча 1-сентәбир сәйшәнбә күни баянат берип, тайландта 17-авғустта йүз бәргән партлаштики 2-гумандарниң хитай пуқралиқидики уйғур болуши мумкинликини билдүргән.

Әнглийәниң б б с агентлиқиниң тайландта турушлуқ мухбири җонас һайдиниң 1-сентәбир елан қилған рәсимлик хәвиридә, тайланд сақчи даирилири тутқун қилинған 2-гумандарниң хитай паспортиниң копийиси елан қилинған болуп, паспортта бу кишиниң мирәли йүсүп исимлик, 1989-йили 1-өктәбир туғулған хитайниң шинҗаң уйғур аптоном район пуқраси икәнлики билдүрүлгән. Б б с агентлиқиниң бу һәқтики хәвиридә йәнә, 17-авғуст тайландтики партлашниң бу йил 7-айда тайланд даирилири қанунсиз чеградин киргән дегән баһанидә хитайға қайтуруп бәргән 109 нәпәр уйғур сәвәбидин йүз бәргән өч елиш һәрикити болуш еһтималлиқиму оттуриға қоюлған.

Хәвәрдә йәнә, тайланд сақчи даирилириниң баянатидики "биз йәнила сорақни давамлаштуруватимиз. У чәтәллик, асасий гумандар болуши мумкин" дегән сөзлири нәқил елинған. Һалбуки, бирнәччә күн илгири тайланд даирилири 17-авғуст йүз бәргән 20 кишиниң өлүшигә сәвәб болған баңкоктики партлаш вәқәсидики гумандарниң уйғур болуш еһтимали юқирилиқини билдүргәндә, хитай һөкүмити тайландниң бу баянатини асассиз дәп әйиблигән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт