Хитай даирилири уйғур дияридики чегра қоғдаш әскәрлирини чегра сақчилириға өзгәртмәктикән

Мухбиримиз әркин
2019-01-04
Елхәт
Пикир
Share
Принт

Хитай даирилири уйғур аптоном районида қораллиқ сақчи әтритиниң чегра қоғдаш қисимлирида һәрбий вәзиписини түгәткән әскәрләрни кәң көләмдә чегра сақчилириға өзгәртишкә башлиған.

Хитайда чиқидиған «йәр шари вақти гезити» ниң хәвәр қилишичә, қораллиқ сақчи әтритиниң чегра қисимлиридин қайтқан әскәрләрниң тунҗи түркүмдики чегра сақчилириға өзгәртилиш қәсәм бериш мурасими 1‏-январ күни уйғур аптоном районлуқ җ х назаритиниң чегра еғизлирини башқуруш понкитида өткүзүлгән. Бу уйғур районда тунҗи қетим һәрбий штаттики әскәрниң коллектип һалда мәмурий штатқа өзгәртилишидур.

«Йәр шари вақти гезити» ниң хәвиридә баян қилишичә, бу өзгириш хитай компартийәси мәркизи комитетиниң өткән йили 3‏-айда чиқарған ислаһат қарариға асасән елип берилған. Хитай һөкүмити чен чүәнгони уйғур аптоном районлуқ парткомға секретар қилип йөткәп кәлгән 2 йерим йилдин бери районниң бихәтәрлик селинмисини һәссиләп көпәйтип, нурғун сақчи хадимлирини қобул қилған.

Кишилик һоқуқ тәшкилатлириниң илгири сүрүшичә, хитай һөкүмити 2017‏-йили уйғур райониға 100 миңдин артуқ сақчи қобул қилған. Униң бихәтәрликкә алақидар қурулушларға сәрп қилған пули шу йили 3 һәссә артқан. Бу қурулушлар 2018‏-йили давамлиқ кеңәйтилгән.

Көзәткүчиләр хитайниң бу арқилиқ уйғурларни қаттиқ тәқиб астиға елип, уларни бу районниң сиясий, иҗтимаий, иқтисади вә мәдәнийәт һаятидики пассип күчкә айландурушни мәқсәт қилғанлиқини илгири сүрүп кәлди. «Йәр шари вақти гезити» ниң хәвиридә ашкарилишичә, чегра сақчисиға өзгәртилгән бу әскәрләр уйғур аптоном райониниң 5700 километирлиқ чегра линийәсидики 16 чегра еғизи вә 10 чегра контрол гурупписида вәзипә өтәйдикән.

Пикирләр (0)
Share
Толуқ бәт