Xitay emeldari chet'el ijtima'iy taratqulirida Uyghur teshkilatlirini chekleshni otturigha qoyghan

Muxbirimiz erkin
2018-03-06
Élxet
Pikir
Share
Print

Xitayning térrorluqqa qarshi turush ishlirigha mes'ul bir emeldari yéqinda ötküzülgen bir xelq'ara yighinda, Uyghur teshkilatlirining twitérgha oxshash ijtima'iy taratquliridiki teshwiqatini chekleshni, buning üchün bu taratqulargha qatti bésim ishlitishni otturigha qoyghan.

Nyu-york waqti géziti" ning yéqinda ashkarilishiche, yuqiriqi pikirni shangxey hemkarliq teshkilatigha qarashliq "Térrorluqqa qarshi turush tetqiqat merkizi" ning bashliqi méy jyenming otturigha qoyghan. U ötken yili 12‏-ayda xitayning wujén bazirida ötküzülgen dunya intérnét qurultiyining bir muhakime yighinida söz qilip, xitayning twétérgha oxshash taratqulargha téximu qattiq bésim ishlitishi kéreklikini tekitligen.

Xewerde bayan qilishiche, méy jyenming bu arqiliq yuqiriqi taratqularning mulazimet siyasitini özgertip, dunya Uyghur qurultiyigha oxshash béyjing hökümiti "Bölgünchi" dep qaraydighan teshkilatlarning teshwiqatini boghup tashlashni telep qilghan. U sözide, "Partiyeni, xitay rehberlirini we xitayning alaqidar dölet istratégiyesini qarilighan yollanmilar" ni öchürüp tashlashni tekitligen.

Xitay hökümiti dölet ichidiki axbarat, tor we ijtima'iy alaqe wasitilirini qattiq kontrol qilipla qalmay, u yene qolini chet'el taratqulirigha sozushni kücheytken. Yéqinda gérmaniyening démlir aptomobil guruhigha qarashliq mirsédis -béniz torida tibet rohaniy rehbiri dalay lamaning sözini ishletkenliki üchün xitayning bésimigha uchrighan. Xitayning "Xelq géziti" mirsédis-béniz shirkitini "Xelqning düshmini" dep élan qilghan. Netijide, mirsédis-béniz shirkiti dalay lamaning sözini öchürüp tashlap xitaydin kechürüm sorighan.

Xitayning pakistanda turushluq elchixanisi ötken yili yene Uyghurlar heqqide maqale élan qilghan "Bügünki pakistan" namliq tor gézitini agahlandurghan. Xitay elchixanisi mezkur gézitni Uyghurlar heqqide maqale élan qilip, xitay-pakistan munasiwitige "Buzghunchiliq qilish" bilen eyibligen idi.

Toluq bet