Америка вә явропа иттипақи дипломатлириниң қошма баянатида, хитайниң уйғурлар районидики қилмиши әйибләнди

Мухбиримиз әркин
2022-04-25
Share

Америка вә явропа иттипақиниң юқири дәриҗилик дипломатлири ‍өткән һәптә қошма баянат елан қилип, хитайниң уйғурлар райондики қилмишини тәнқид қилған, шундақла хитайни украина мәсилисидә русийәгә ярдәм бәрмәслик тоғрисида агаһландурған. Мәлум болушичә, американиң муавин ташқи ишлар министири венди шерман, әгәр хитай русийәниң украина урушиға “әмәли ярдәм” бәрсә, униңға ембарго йүргүзидиғанлиқини билдүргән. Венди шерманнбиң башчилиқидики бир америка дипломатик өмики өткән һәптә явропа иттипақини зиярәт қилип явропа иттипақи ташқи ишлар комиссариятиниң баш катипи стефано санино билән хитай мәсилисини өз ичигә алған көп хил темиларда сөһбәт елип барған.

Икки тәрәп 21- вә 22-апрел күнлири өткүзүлгән сөһбәттин кейин елан қилған қошма баянатта, хитайниң уйғурлар районидики қилмишини тәнқидлигән. Таратқуларниң хәвәр қилишичә, явропа иттипақи ташқи ишлар комиссарияти баш катипи стефано, “биз йәнә шинҗаңдики вәзийәткә, болупму шу җайдики кәң көләмлик ‛сиясий қайта тәрбийәләш‚ лагерлири тори, кәң көләмлик назарәт қилиши һәрикити, уйғур вә башқа аз санлиқ милләтләрниң диний әркинликини системилиқ чәкләш, мәҗбурий әмгәккә селиш қатарлиқларға көңүл бөлимиз” дегән.

Қошма баянатта, америка вә явропа иттипақиниң хитайни давамлиқ хәлқара җәмийәтниң русийәгә йүргүзгән җазасидин ‍өзини қачурмаслиққа яки униңға бузғунчилиқ қилмаслиққа вә яки русийәгә һәрқандақ шәкилдә ярдәм бәрмәсликкә чақиридиғанлиқи билдүрүлүп, русийәни қоллаш өзлириниң хитай билән болған мунасивитигә тәсир қилидиғанлиқи тәкитләнгән. Венди шерман мундақ дегән: “биз хитайға шуни ениқ билдүримиз, русийәгә қаритилған җазадин ‍өзини қачурмаслиқни яки униңға бузғунчилиқ қилмаслиқни, һәрқандақ шәкилдики һәрбий ярдәм бәрмәсликни ейтимиз. Бу хил қоллашлар биз һәр қайсимизниң хитай билән болған мунасивитимизгә тәсир қилидиғанлиқини қайта тәкитләймиз”.

Баянатта ейтилишичә, икки тәрәп йәнә хитайниң учурни контрол қилиши вә сахта учур тарқитишиғиму диққәт қилмақтикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт