Уйғур дияри билән ниңшя оттурисидики “истратегийәлик һәмкарлиқ” диққәт қозғимақта

Хитай һөкүмити башқурушидики “хәлқ тори” ниң 11-майдики хәвиридә ейтилишичә, уйғур аптоном районлуқ парткомниң секретари ма шиңруй башламчилиқидики өмәк алдинқи күни ниңшя хуйзу аптоном райониға берип екскурсийә вә тәкшүрүштә болған. Хәвәрдә ейтилишичә, бу қетимқи өмәк тәркибидә икки җайдики аптоном районлуқ партком вә һөкүмәтләрниң асаслиқ каттабашлири толуқ орун алған.

Хәвәрдә бу қетимлиқ тәкшүрүшниң “ши җинпиңниң йеңи дәврдики хитайчә алаһидиликкә игә сотсиялизм идийәси” ни әстайидил өгиниш һәмдә “ши җинпиңниң шинҗаң вә ниңшяни көздин кәчүргән вақитта қилған сөзлириниң роһини толуқ изчиллаштуруш” икәнлики алаһидә тәкитләнгән. Шуниң билән биргә ниңшядики енергийә байлиқини һәмдә көмүр канлирини қезиш саһәси билән тәҗрибә алмаштуруш, нөвәттики “бир бәлбағ бир йол қурулуши” ниң ғәлибилик ишқа ешиши үчүн “шинҗаң вә ниңшя районлириниң истратегийәлик һәмкарлиқини толуқ әмәлгә ашуруш”, шу арқилиқ көмүр йөткәш қурулушиниң вә йәрлик байлиқларниң қезилишини тезлитиш қатарлиқ мәсилиләрниму музакирә қилған.

Ма шиңруй бу һәқтә қилған сөзидә ениқ қилип “биз бу хил һәмкарлиқ асасида район һалқиған мәдәнийәт вә саяһәт суписи бәрпа қилишимиз, шу арқилиқ ислам динини хитайчилаштуруш, җуңхуа ортақ кимлики чүшәнчисини чоңқурлаштуруш, шуниңдәк йеңи дәврдики юқири сүпәтлик тәрәққиятни әмәлгә ашурушимиз лазим” дегән. Ниңшя хуйзу аптоном райониниң партком секретари ляң йәншүн болса бу нуқтиларни муәййәнләштүрүш билән биргә “баш шуҗи немә дегән болса биз шу бойичә иш көрүшимиз лазим” дегән. Буниң билән бу қетимқи екскурсийәниң асаслиқ мәқсити бу районлардики байлиқ қезиш вә йөткәш қурулушини техиму үнүмлүк давам қилдуруш һәмдә шу арқилиқ ғәрб дунясиниң түрлүк иқтисадий җаза тәдбирлири түпәйлидин хитайниң нөвәттә һалсирап қеливатқан “бир бәлбағ бир йол қурулуши” ға “күч қошуш” икәнлики васитилик һалда әскәртилгән.

Хитай һөкүмитиниң уйғур дияридики байлиқ қезиш истратегийәси вә сиясий бастуруш тәдбирлири тоғрисида сөз болғанда америка тәвәсидики хитай өктичи зиялийси тең бяв радийомизниң зияритини қобул қилиш җәрянида “уйғурлар дуч кәлгән қисмәтләр һазир хитайниң башқа җайлириға кеңәйтилиш алдида туруватиду. Бу бәкму хәтәрлик йүзлиништур” дегәниди. Ма шиңруй башчилиқидики өмәкниң бу қетимқи зиярити арқилиқ уйғур диярида “синақтин өткән” сиясий вә иқтисадий тәдбирләрниң ниңшя тәвәсидә кеңәйтилиши техиму рошән әкс әткән. Мәлум болушичә, ма шиңруй башчилиқидики бу өмәк 2023-йилиниң бешида чиңхәй вә гәнсу өлкилиридиму мушу хилдики екискурсийәдә болғаниди.