Xitay da'iriliri kowid cheklimisini boshatqan bolsimu, lékin “Shinjangni bashqurush ‍sitratégiyesi” ni dawamlashturidighanliqini bildürdi

Xitay da'iriliri 24-noyabir ürümchidiki Uyghurlar olturushluq binada yüz bergen paji'elik ot apitidin kéyin kowid cheklimisini boshatqan bolsimu, lékin rayonda “Shinjangni bashqurush istratégiyesi” ning dawamliq ijra qilinidighanliqini bildürgen. Xitay taratqulirining xewer qilishiche, Uyghur aptonom rayonluq partkomining 10-nöwetlik komitéti yéqinda 6-qétimliq yighin chaqirip, buningdin kéyin rayonda yolgha qoyulidighan siyasetning xizmet yölinishini orunlashturghan.

Yighinda, yuqiri bésimliq zerbe bérishning tewrenmes yüzlinishini saqlash, xeterni bashqurush we kontrol qilish xizmet méxanizmini elalashturush we yaxshilash, her qaysi jehetlerdiki yoshurun xeterning aldini élish hem bir terep qilish telep qilin'ghan.

Bu yighin 11-ayning 20-küni échilghan bolsimu, lékin xitay hökümet taratqulirining bu xewerni néme üchün emdi bérishidiki seweb melum emes. Perez qilinishiche, bu, mezkur yighinning arqisidinla 24-noyabir küni ürümchide paji'elik ot apiti yüz bérip, nurghun Uyghurning hayatidin ayrilishi, xitayning dölet ichi we sirtida keng kölemlik naraziliq heriketlirini keltürüp chiqirip, buning türtkiside xitayning kowid cheklimisini boshitishqa mejbur bolushi bilen munasiwetlik bolushi mumkin iken. Yighinda, “Shinjangning küchlük zamaniwi sotsiyalistik (xitay) döliti berpa qilishtiki istratégiyelik ornini aydinglashturup”, rayonda “Etrapliq, üch ölchemlik we eqliy iqtidarliq ijtima'iy bixeterlik mudapi'e sistémisi berpa qilish” tekitlen'gen.

Yighin yene rayonda “Jungxu'a milliti ortaq éngini mustehkem turghuzup, boshluq, medeniyet, iqtisad, jem'iyet, psixologiye qatarliq jehetlerde her millet kishilirining her tereplimilik singip kétishini emelge ashurush”, “Jongxu'a milliti ortaq éngini mustehkemlesh jehettiki her xil xizmetlerni shekil, héssiyat we ünümdarliq jehetlerdin yaxshi ishlesh”, “‍Silamni xitaylashturushta ching turup, dinni sotsiyalistik jem'iyetke maslishishqa yéteklesh” ni telep qilin'ghan.