Xitay islam jem'iyiti: “Shinjangda islam dinini xitaychilashturushni ilgiri sürüshke yardem qilimiz”

Atalmish “Xitay memliketlik islam jem'iyiti” ning re'isi yang faming bashchiliqidiki bir hey'et Uyghur élida ziyarette bolup, xitay da'irilirining Uyghurlargha qarita élip bériwatqan “Shinjangda islamni xitaychilashturush” herkitini qollaydighanliqi we bu heriketni algha sürüshke yardem qilidighanliqini bildürgen.

Xitay taratqulirining xewer qilishiche, “Xitay islam jem'iyiti” ning mezkur re'isi bu sözlerni 23-féwral Uyghur aptonom rayonluq partkomning sékritari ma shingruy bilen körüshkende éytqan. Halbuki, xitay taratqulirining bu heqtiki xewerliride, wekiller ömikining xitayning Uyghur rayonidiki diniy siyasiti kishilik hoquq teshkilatliri, gherb elliri we b d t kishilik hoquq aliy komissari ‍ishxanisining tenqidige uchrawatqan bir peytte ziyarette bolushining konkirét meqsiti tilgha élinmighan.

B d t kishilik hoquq aliy komissari ishxanisining ötken yili élan qilghan “Shinjang doklati” da, xitayning “Diniy radikalliq” qa bergen éniqlimisigha so'al qoyghan, shundaqla xitayning “Diniy radikalliqqa qarshi turush” ni bahane qilip, normal diniy erkinlikni chekligenliki tenqid qilghan. Xitayning rayondiki herkitining “Insaniyetke qarshi jinayet shekilendürüshi mumkinliki” bildürülgen idi.

“Shinjang géziti” ning 24-féwraldiki xewiride bildürüshiche, yang faming 23-féwral ma shingruy bilen körüshkende mundaq dégen: “Xitay islam jem'iyiti özining funksiyelik rolini yenimu ilgirlep jari qildurup, diniy guruppilarning qurulushi we ixtisasliqlarni terbiyelesh qatarliq ishlargha aktip yardem béridu. Shinjangda islam dinining xitaychilashturulushigha yardem bérip, diniy inaqliq, ijtima'iy inaqliq we milletler inaqliqini téximu yaxshi algha süridu.”

Körüshüshte ma shingruy, “Kompartiyening yéngi dewrdiki shinjangni bashqurush istratégiyesini toluq we toghra ijra qilip, xitayning islam dinini xitaychilashturush yönilishide qet'iy ching turush” ni, “Shinjangda islam dinining sotsiyalistik jem'iyetke maslishishini aktip ilgiri sürüsh” ni tekitligen, shundaqla shinjangning diniy xizmetliride yéngi weziyet yaritishni telep qilghan.