Uyghur aptonom rayonluq ishchilar uyushmisining mu'awin re'isi enwer abduraxman tutqun qilin'ghan

Muxbirimiz erkin
2020-01-17
Élxet
Pikir
Share
Print

Uyghur aptonom rayonluq ishchilar uyushmisining mu'awin re'isi enwer abduraxman "Intizamgha qattiq xilapliq qilish" seweblik tutqun qilinip, edliye tarmaqlirining bir terep qilishigha tapshurulghan. U yéqinqi 3 yildin béri "Intizamgha xilapliq qilish" bilen eyiblinip qolgha élin'ghan yuqiri derijilik Uyghur kadirlirining biri. Xitay hökümitining 2017‏-yili bashlan'ghan chong tutqunidin béri uning siyasitige qarshi turghan yaki uni estayidil ijra qilmighan nurghun Uyghur kadirlar "Intizamgha xilapliq qilish" yaki "Chériklik" bilen eyiblinip tutqun qilin'ghanidi.

Xitay merkizi intizam tekshürüsh we réwiziye komitétining torida ashkarilinishiche, Uyghur aptonom rayonluq partkom yéqinda yighin chaqirip, enwer abduraxmanni jazalashni qarar qilghan. U ötken yili toxtitip qoyulup, tekshürülüshke bashlighanidi. Yighinda u "Siyasi intizamgha, teshkili intizamgha, turmush intizamigha qattiq xilapliq qilip, xizmette qanunsizliq qilish, para élish qatarliq jinayetler" bilen eyiblinip, partiyedin qoghlap chiqirish, wezipisidin élip tashlash, mal-mülkini musadire qilish, uning mesilisini edliye organlirining bir terep qilishigha tapshurup, qanuni jawabkarliqqa tartish qarar qilin'ghan. Lékin, merkizi intizam tekshürüsh komitéti we réwiziye nazaritining uquturushida, uning bundaq éghir jazagha tartilishida sadir qilghan konkrét qilmishi tilgha élinmighan.

1970‏-Yili bügür nahiyeside tughulghan enwer abduraxman xitay merkizi partiye mektipining iqtisad kespide aspirantliqni oqughan. U 1992‏-yili xizmetke chiqqandin tartip hazirghiche korla sheherlik ittipaq komitétining sékritari, oblastliq partkomning mu'awin sékritari, aptonom rayonluq ittipaq komitétining mu'awin sékritari, qara sheher nahiyesining mu'awin sékritari qatarliq wezipilerni ötigen. U 2015‏-yildin béri Uyghur aptonom rayonluq ishchilar uyushmisining mu'awin re'isilik wezipisini atqurup kéliwatqan idi.

Toluq bet