Үрүмчидә корона вируси билән юқумланған икки нәпәр аламәтсиз юқумдар көпәйгән

Мухбиримиз ирадә
2022.04.28
Share on WhatsApp
Share on WhatsApp

Уйғур диярида “вирус юқумини нөлгә чүшүрүш” тәдбирлири җиддий иҗра қилиниватқан болсиму, әмма вирус юқуми йәнила мәвҗут икән.

Хитай һөкүмитиниң башқурушидики “шинҗаң сәһийә тори” ниң 28-апрелдики хәвиридә ейтилишичә, 4-айниң 27-күни саәт 0 дин 24 кечә болған арилиқта, уйғур ели (шинҗаң ишләпчиқириш-қурулуш биңтуәнини өз ичигә алиду) да йеңидин 2 нәпәр аламәтсиз юқумдар көпәйгән болуп, уларниң һәр иккилиси үрүмчиниң мидуң районида икән.

Шундақ болғанда, 4-айниң 27-күни саәт 24 кечә, уйғур елида кесәллик қозғалған бимар йоқ болуш билән биргә, аламәтсиз юқумланғучи сани җәмий икки нәпәр дәп көрситилгән.

Хитай һөкүмити һазирға қәдәр вирус юқумиға даир учурларға “дөләт мәхпийити” қатарида муамилә қиливатқан болғачқа, бу һәқтики һәқиқий әһвалниң зади қандақ икәнлики намәлум болуп кәлмәктә.

Нөвәттә хитайниң шаңхәй шәһиридә қамал йәнила интайин қаттиқ иҗра қилиниватқан болуп, қамалниң йолға қоюлушиға аит оттуриға чиқиватқан синтлиқ көрүнүшләр иҗтимаий таратқуларда кәң тарқалмақта.

Американиң “NBC NEWS” ториниң хәвәр қилишичә, йеқинда хитай даирилири бейҗиңдиму 140 нәпәр юқумланғучи байқалғанлиқини елан қилған. Шуниң билән биргә, бейҗиң даирилириниң бейҗиңдики 20 милйонға йеқин адәмни вирус тәкшүрүши қилишқа буйруши болса аһалиләрни қаттиқ сарасимигә салған болуп, өзлириниң шаңхәйдикидәк узун муддәт қамал астида қелиштин әнсиригән аһалиләр йемәк-ичмәк дуканлириға аққаникән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.