Uyghur rayonluq hökümetning mu'awin re'isi qeyser abdukérimning “Shinjangning ishiki hemishe ochuq” déyishi mesxirige qalghan

Xitay hökümitining Uyghurlargha irqiy qirghinchiliqi we insaniyetke qarshi jinayet yürgüzüwatqanliqi xelq'araliq organlarda qattiq eyibleshke uchrawatqan bir peytte, xitay tashqi ishlar ministirliqining bayanatchisi xu'a chünying tiwittér hésabi arqiliq bir widiyo tarqitip Uyghur élida hemme ishning normalliqini ilgiri sürdi.

U widiyoda Uyghur rayonluq hökümetning mu'awin re'isi qeyser abdukérim in'glizche sözlitilgen. U sözide “Shinjangning ishiki hemishe ochuq. Heqiqetning ishiki hemishe ochuq. Körüsh-ishinish dégenliktur” dep söz qilghan.

Qeyser abdukérim sözide yene “Biz téximu köp insanlarning bu yerge kélip, 25 milyondin artuq shinjang xelqini yéqindin körüshini, yéza qishlaqlirimizni, bazarlirimizni, bizning turmushimizni yéqindin körüshini ümid qilimiz” dégen.

Xitay hökümiti téxi mushu ayning 10-küni b d t chaqirilghan “Xelq'araliq islam düshmenlikige qarshi turush künini xatirilesh pa'aliyiti” de Uyghur musulmanlirigha qiliwatqan ziyankeshliki tüpeylidin amérikaning b d t da turushluq elchisi linda tomas girinfiyld teripidin qattiq tenqidlen'genidi. Arqidinla, xu'a chünyingning tiwittérda bu widiyoni tarqitishi diqqet qozghidi.

Tiwittér qollan'ghuchiliri bolsa xitayning Uyghur aptonom rayonluq hökümetning mu'awin re'isi qeyser abdukérimni sözlitip turup qilghan bu teshwiqatini qattiq mesxire qilghan.

Nurghunlighan tiwittir qollan'ghuchiliri xu'achünyingge qayturghan inkasida buning qipqizil yalghanliqini, bir chet'ellikning Uyghur éli we tibet qatarliq jaylargha xalighanche bérip, saqchining teqibisz aylinip yürüshining mumkin emeslikini bildürüshken.

Bezi tiwittir qollan'ghuchiliri hetta inkasida “Géping rast bolsa sen awwal wuxendiki tejribixanini xelq'araliq tekshürgüchilerge échip baq” dégen.