Xitay korona wirusining ziyinini tölimise uning en'gliyediki mal-mülkini tartiwélish telep qilindi

Muxbirimiz erkin
2020.04.13
Share on WhatsApp
Share on WhatsApp

Xitayning korona wirusini yoshurup, en'giliyeni ziyan'gha uchratqanliqi üchün tölem tölishi, eger tölem töleshni ret qilsa, en'gliye hökümiti xitayning en'gliyediki mal-mülkini musadire qilip, xitaygha qayturidighan qerzini qayturushni toxtitishi telep qilindi.

En'gliye “Hénriy jekson jem'iyiti” ning ijra'iye diréktori alan méndozaning bildürüshiche, en'gliye tölemni ündürüwélish üchün “Herqandaq qanunluq wasitilerni qollinishqa heqliq” iken.

U en'gliye “Ékspres” gézitige qilghan sözide: “Eger en'gliye xitay üstidin erz qilip, tölem tölitish hoquqigha érishken teqdirde xitay buninggha pisent qilmisa, biz tölemni ündürüwélish üchün herqandaq qanunluq wasitilerni qollinishqa heqliqmiz. Bu éhtimalliq xitayning dölet igidarchiliqidiki mal-mülkini tartiwélish yaki uning dölet igidarchiliqidiki igilik hoquq qerzini qayturushni toxtitishni öz ichige alidu,” dégen.

Melum bolushiche, xitayning igilik hoquq meblighi fondining en'gliyede nurghun mal-mülki we meblighi bar bolup, xitay en'gliyening nurghun ul sana'et shirketlirige meblegh salghan iken.

En'gliyening boris jonson hökümiti ilgiri xitaygha yéqinliship, uning en'gliye 5G ul esliheler qurulushigha qismen qatnishishigha yol qoyghan. Bu amérikaning qarshiliqigha uchrighan idi. “Muhapizetchi” gézitining ashkarilishiche, en'gliye istixbarat organliri en'gliye hökümitining korona wirusi krizisi axirlashqandin kéyin xitay bilen bolghan munasiwitini qaytidin közdin köchürüshini, yuqiri téxnika we istiratégiyelik sana'etlirini téximu qattiq kontrol qilishni telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.