Uchturpandiki Uyghur saqchi warisjan memet b d t da xitayning “Térorluqqa qarshi turush kürishi” ni aqlighan

Uyghur rayonidiki basturushliri sewebidin xelq'arada, bolupmu bezi gherb parlaméntliri teripidin “Irqiy qirghinchiliq” élip bérish bilen eyibliniwatqan xitay hökümiti Uyghur saqchilirini b d t gha chiqirip, özining rayondiki “Térorliqqa qarshi turush siyasetliri” ni aqlimaqta. Xitay taratqulirining xewer qilishiche, b d t kishilik hoquq kéngishining 17-mart küni ‍ötküzülgen 52-qétimliq yighinida, Uyghur élining uchturpan nahiyesi otbéshi saqchi ponkitining saqchisi warisjan memet xitaygha wakaleten söz qilip, atalmish “Shinjangdiki zorawanliq-térorluqning ziyankeshlikliri” ni tonushturghan.

Bu, xitayning Uyghurlarni tunji qétim b d t kishilik hoquq kéngishining yighinigha ékran arqiliq yaki shexsen qatnashturup, özining siyasitini aqlishi bolmisimu, lékin bu xitayning rayondiki basturush heriketlirining aldinqi sépidin orun ‍orun alghan Uyghur saqchilirini tunji qétim b d t kishilik hoquq kéngishining yighinigha chiqirip, basturush herkitini aqlishidur.

Melum bolushiche, warisjan memet amérikaning b d t da turushluq wekili linda tomas grénfild 14-mart küni b d t ning nyu-yorktiki bash shtabi binasida ötküzülgen “Islam wehimisi” ge qarshi turush heqqidiki xelq'ara yighinda xitayni Uyghurlargha qarita dawamliq “Irqiy qirghinchiliq” we “Insaniyetke qarshi jinayet” sadir qilish bilen eyiblishining arqisidinla kishilik hoquq kéngishide sözlitilgen.

“Xitay xewerliri tori” ning bildürüshiche, yéqinqi 13 yildin béri otbéshi saqchi ponkitida wezipe ötep kelgen warisjan memet yighinda özining “Ötken bir qanche yilda bir nechche qétimliq bir terep qilish herketlirige qanashqanliqi” ni bildürüp, “Öz közüm bilen kördümki, zorawanliq-térorluq déloliri nurghun bigunah ölüm-yétim we zor miqdardiki mal-mülüklerning ziyinini keltürüp chiqardi, jem'iyet muqimliqigha zor ziyan élip keldi” dégen. Xitay hökümiti özining rayondiki herkitini “Térorluqqa qarshi turush” dep süpetlisimu, lékin amérika tashqiy ishlar ministirliqi we kishilik hoquq teshkilatliri uning herkitining térorluq bilen alaqisi yoqliqini bildürmekte.