Хитайниң сабиқ баш министири вен җябавниң мақалиси хитай иҗтимаий таратқулирида чәкләнгән

Мухбиримиз әркин
2021-04-19
Share

Хитайниң сабиқ баш министири вен җябавниң "макав авангарти" гезитидә елан қилинған мақалисини хитай иҗтимаий таратқулирида һәмбәһирләш чәкләнгән. Мәлум болушичә, вен җябав анисиниң вапати мунасивити билән елан қилған 4 қисимлиқ мақалисидә хитайни адиллиқ, әркинлик вә инсаний қәдир-қиммәтни һөрмәтләшкә чақирған икән. Униң "мениң анам" мавзулуқ мақалиси "макав авангарти" гезитидә 25-марттин 15-априлғичә болған санлирида 4 қисимға бөлүнүп елан қилинған.

Вен җябавниң мақалиси чәклиништин бурун хитай иҗтимаий таратқулирида йүз миңлап һәмбәһирләнгән. Көзәткүчиләр униң мақалисини ш җинпиңға қаритилған йошурун тәнқид, дәп қариған. Униң мақалисидә: "мән кәмбәғәл вә аҗизларға һессидашлиқ қилимән. Бозәк қилиш вә зулумға қарши туримән…мениң көңлүмдә хитай адил вә һәққаний бир дөләт болуши керәк. Кишиләрниң ичкий дуняси, адимийлики вә тәбиийтигә һәр вақит һөрмәттә болуши лазим," дейилгән.

Вен җябавниң мақалисиниң ши җинпиң диктатурлуқ, истибдатлиқ һөкүмранлиқи қуруп, хәлқара тәртипкә тәһдит селиш, шундақла уйғурларға "ирқий қирғинчилиқ", "инсанийәткә қарши җинайәт" садир қилиш билән әйиблинип, хәлқарада хитайни җавабкарлиққа тартиш чақириқлири күнсери улғийиватқан бир мәзгилдә елан қилиниши диққәт қозғиди. "вайис дуня хәвәрлири" ниң билдүрүшичә, хитайниң үндидар мунбири бу мақалә "үндидар аммивий мунбириниң мәшғулат қаидисигә хилаплиқ қилғанлиқи үчүн һәмбәһирләш чәкләнгәнлики" ни ейтқан.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт