Хитай, «шинҗаң мәсилиси» дә б д т билән «кәң даирилик пикир бирлики» һасил қилғанлиқини билдүрди

Мухбиримиз әркин
2019-06-17
Елхәт
Пикир
Share
Принт

Хитай һөкүмити террорлуққа қарши туруш мәсилисидә б д т билән «кәң даирилик пикир бирлики» һасил қилғанлиқини билдүргән. Ройтерс агентлиқиниң хәвәр қилишичә, хитай ташқи ишлар министирлиқи б д т ниң террорлуқ ишлириға мәсул русийәлик муавин баш катипи владимир воронкофниң уйғур районида елип барған зияритидин кейин бу сөзләрни қилған. Воронкофниң өткән һәптидики зиярити америка, әнглийә қатарлиқ дөләтләр вә хәлқара кишилик һоқуқ тәшкилатлириниң қаттиқ тәнқидигә учриған. Американиң муавин ташқи ишлар министири җон сулливан өткән җүмә күни воронкофниң зияритидин қаттиқ әндишә қилидиғанлиқини билдүргән. У, воронкофниң зиярити «бейҗиңниң уйғур башқа мусулманларға қарши елип бериватқан бастуруш һәрикитини давамлиқ пәрдазлап, униң қанунсиз террорлуққа қарши туруш һәрикитини қанунлуқтәк көрситип қойидиғанлиқи» ни тәкитлигәниди.

Ройтерсниң хәвиридә қәйт қилинишичә, хитай ташқи ишлар министирлиқи 16‏-июн воронкофниң зиярити һәққидә тохтилип: «икки тәрәп хәлқара террорлуққа қарши туруш вәзийити, б д т билән хитайниң террорлуққа қарши туруш һәмкарлиқи һәққидә пикир алмаштурди вә кәң даирилик пикир бирлики һасил қилди» дегән. 

Воронкоф, хитай һөкүмити б д т кишилик һоқуқ алий комиссари мишел башилейни уйғур районида зиярәттә болушқа тәклип қилған, лекин башилей хитай һөкүмити униң халиған лагерни зиярәт қилишиға йол қоймиғичә бу тәклипини қобул қилмайдиғанлиқини билдүргән бир мәзгилдә мәзкур районда зиярәттә болди. Мишел башилейниң баянатчиси марта хуртадо өткән җүмә күни радийомизда язма баянат елан қилип, «алий комиссар хитайниң тәклипини тапшуруп алди. Лекин биз хитай һөкүмити билән тәлтөкүс тәкшүрүш елип бериш һәққидә давамлиқ сөзлишиватимиз» дегән. 

Хитай, б д т алий комиссарини кишилик һоқуқ кеңишиниң 24‏-июн башлинидиған 41‏-нөвәтлик йиғини һарписида уйғур райониға тәклип қилди. Кишилик һоқуқ көзитиш тәшкилатиниң хитай ишлири директори софийә ричардсонниң илгири сүрүшичә, бу хитайниң йиғинда йәнә тәнқидлинишкә тақабил туруш үчүн қолланған бир тактикиси икән. Хитай ташқи ишлар министирлиқи воронкоф билән «кәң даирилик пикри бирлики» һасил қилғанлиқини илгири сүргән болсиму, лекин униң уйғур районида кимләр билән көрүшкәнлики, террорлуққа қарши конкрет қайси мәсилиләрдә «кәң даирилик пикир бирлики һасил қилғанлиқи» ни чүшәндүрмигән.

Пикирләр (0)
Share
Толуқ бәт