Хотән вилайәтлик мәмурий мәһкиминиң муавин валийси тутуп туруп тәкшүрүлмәктикән

Мухбиримиз қутлан
2016-12-26
Share

Уйғур аптоном районлуқ интизам тәкшүрүш комитетиниң тор бетидин мәлум болушичә, хотән вилайәтлик мәмурий мәһкиминиң муавин валийси, қошумчә гума наһийәлик парткомниң секретари шен йи йеқинда "интизамға еғир дәриҗидә хилаплиқ қилиш" җинайити билән тутуп туруп тәкшүрүлмәктикән.

Бу уйғурлар мәркәзлик олтурақлашқан хотән вилайитидә "парихорлуқ" вә "чириклик" билән тутулған йәнә бир юқири дәриҗилик хитай әмәлдари икән.

Хитай таратқулири бу йил 4-айда хотән шәһәрлик парткомниң секретари чен йвәнхуаниң "интизамға еғир дәриҗидә хилаплиқ қилиш" җинайити билән тутуп турулуп тәкшүрүлүватқанлиқини хәвәр қилған иди.

Муһаҗирәттики сиясий анализчилар, уйғур диярида мутләқ көп қисим хитай әмәлдарлириниң "парихорлуқ" вә "чириклик" билән җазалиниватқанлиқини, әмма мутләқ көп йәрлик уйғур әмәлдарларниң болса "сиясий мәйдани мустәһкәм болмаслиқ" яки "мәсулийитини ада қилмаслиқ" билән җазаланғанлиқини илгири сүрмәктә.

Йеқинқи йиллардин буян хитай һөкүмити өзи түзгән аталмиш "аптономийә қануни" ға өзи хилаплиқ қилип, наһийә, вилайәт дәриҗилик һакимийәт органлиридики уйғур кадирларниң нисбитини зор дәриҗидә азайтқан вә хитайлаштурған.
Игилинишичә, хотән вилайитидә уйғурларниң нопуси вилайәт омумий нопусиниң 95% тин көпрәк қисмини игилисиму, әмма хотән вилайәтлик мәмурий мәһкиминиң нөвәттики 1 нәпәр баш валийси билән 11 нәпәр муавин валийси ичидә пәқәт 4 нәпирила уйғур болуп, қалған 8 нәпири хитайлардин икән.

Хитай әмәлдарлиридики омумйүзлүк "парихорлуқ" вә "чириклик" һадисиси билән райондики һәр дәриҗилик һакимийәт органлириниң хитайлаштурулуши көзәткүчиләрниң диққитини қозғимақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт