Xitay filippin'ge bergen 100 ming dollar i'ane xitayni osallashturdi

Xitay da'iriliri filippindiki apetke bashta peqet 100 ming dollar i'ane qilghan bolup, bu xitayni xelq'ara diplomatiye sehniside intayin osal ehwalgha chüshürüp qoyghan.

Xitay da'iriliri filippin'ge bergen yardem sommisi bara - bara 1 milyon 800 ming dollargha yetken bolsimu, halbuki, bu yaponiye i'ane qilghan 30 milyon dollar, amérika yardem qilghan 20 milyon dollar hetta shiwétsiyediki öy jahazliri shirkiti IKEA bergen 2 milyon 700ming dollar i'ane alida boyun qisip qalghan.

Xitay ötken bir nechche yildin buyan filippin da'iriliri bilen déngiz teweliki majirasi qilip kéliwatqan idi.

Gerche bu majira herbiy sürkilish derijisige bérip yetmigen bolsimu, bu ikki dölet munasiwetlirini soghuqlashturghan.

Xelq'ara axbaratlarning körsitishiche, meyli qandaq bolushidin qet'iy nezer, dunyadiki ikkinchi chong iqtisadiy küch bolghan xitayning insaniy yardemge bolghan inkasi uning xelq'ara sehnilerde özni qeyerge qoyushni bilelmeywatqanliqini körsitidiken.

Filippin ötken hepte teyféng borini we déngiz tashqinining hujumigha uchrighan. Apette ölgen adem sani 4 minggha yéqinlashqan, 20 ming adem yarilan'ghan, bir nechche milyon adem öy - makansiz qalghan idi.

Amérika ewetken qutquzush esliheliri filippin'ge yetküzüldi. Nöwette amérika déngiz armiyisi filippinda qutquzush we dawalash ishlirini bashliwetti.

Xitay filippin'ge bergen bu intayin az miqdardiki yardem xelq'ara metbu'atlardila emes xitay tor qollan'ghuchiliri arisidimu naraziliq qozghighan.