G7 Дөләтлири хитай вә униң начар сода адәтлиригә тақабил турушта һәмпикир икән

Мухбиримиз ирадә
2021-03-31
Share

Ройтерс агентлиқиниң хәвәр қилишичә, әнглийә һөкүмити G-7 дөләтлиридики иттипақдашлиридин хәлқара сода системисиға бузғунчилиқ қилиштәк "начар һәрикәтләр" билән шуғуллиниватқан хитайға зәрбә беришни вә шундақла дуня сода тәшкилатиниң вақти өткән, үнүмсиз қаидилирини түзитишини тәләп қилидикән.

Әнглийә G7 дөләтлириниң бу йиллиқ рәис дөләтлик вәзиписини өтәватқан болуп, әнглийә сода министири лиз трус 31-март күни G7 дөләтлириниң сода министирлири вә дуня сода тәшкилатиниң йеңи мәсулини күтүвалидикән.

Лиз трус йеқинда "пул-муамилә вақит гезити" ниң зияритини қобул қилғанда мундақ дегән: "бу хитайға нисбәтән қаттиқ туридиған вә уларниң йәршари сода системисидики һәрикитигә қаттиқ зәрбә беридиған вақиттур. Шуниң билән бир вақитта дуня сода тәшкилатиниму ислаһ қилидиған пәйт. Нурғун тәрәпләрдин қариғанда у 90-йилларда тохтап қалди. Дуня сода тәшкилатини ислаһ қилинмиса, G7 дөләтләр өз ичидә сода қилидиған башқа рамкиларни тапалайду".

Лиз трус ханим йәнә, G7 дөләтлири сода министирлиқиниң йиғинидин илгирики баянатидиму хәлқара сода адил болмиған тәқдирдә, әркин тиҗарәткә болған ишәнчниң йоқайдиғанлиқини билдүрүп "зорлуқ ишлитиштин тартип муһитниң начарлишиши вә билим мүлүк һоқуқини оғрилашқичә болған начар һәрикәтләр кишиләрниң ишәнчини йоқатти. Дуня сода тәшкилати қурулғанда хитай иқтисади америка иқтисадиниң он пирсәнтичилик иди. Униң һазирму өзини тәрәққий қиливатқан дөләт сүпитидә көрситиши кишини һәйран қалдуриду, бу қаидиләрни өзгәртиш керәк" дегән.

Ройтерсниң хәвиридә ейтилишичә, америка президенти җов байден қатарлиқ G7 дөләтлириниң рәһбәрлириму дуня сода тәшкилатини ислаһ қилиш вә хитайниң күнсери күчийиватқан йәршариви тәсиригә тақабил туруш мәсилисидә һәмпикир икән. Йеқинда әнглийәниң ташқи сияситигә аит бир истратегийәлик доклатта, һинди-тенч окянда хитай тәсирини тәңшәш үчүн техиму көп һәрикәт қоллиниш зөрүрлүки гәвдиләндүрүлгән болуп, хитайниң мустәбит рәһбәрлики вә иқтисадий күч әнглийәниң иқтисадий бихәтәрликидики әң чоң дөләт тәһдит, дәп тәсвирләнгән икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт