USCC: "Xitay hökümiti amérikadin hoquq we tesir küch talashmaqta"

Muxbirimiz jewlan
2020-12-02
Share

"Erkin asiya radiyosi" in'gilizche qanili 1-dékabir amérika-xitay iqtisad we bixeterlikni bahalash komitéti (USCC) ning yilliq doklati asasida "Xitay hökümiti amérikadin hoquq we tesir küch talashmaqta" namliq bir xewerni élan qilghan bolup, xitay re'isi shi jinping rehberlikidiki xitay hökümitining amérika bilen herbiy küch we iqtisad jehette keskin riqabetlishiwatqanliqi otturigha qoyulghan.

USCC Élan qilghan yilliq doklatta, xitay kompartiyesining hazir özini amérika we bashqa démokratik döletler bilen dunya tertipini we dunyaning kelgüsini qayta belgilesh üchün sistémiliq küresh qiliwatimiz dep qaraydighanliqi éytilghan. Mezkur doklatta: "Xitay hazir künséri éshiwatqan küchi bilen xelq'ara tertipni özgertishke hemde zomigerlik siyasitini qanunlashurushqa urunmaqta؛ iqtisad, bixeterlik we siyasiy menpe'et üchün kéngeymichilik qilip, özliri heqliq dep qarighan dunya xojayinliqini emelge ashurushqa tirishmaqta," déyilgen.

Mezkur doklatta yene xitayning herbiy ishlargha ghayet zor meblegh sélip, xitay azadliq armiyesini "Dunyawi qoshun" qilip qurup chiqishqa atlan'ghanliqi, xitayning dölet ichi we sirtidiki déngiz portlirining herbiy ishlargha ishlitish üchün éliwélin'ghanliqi bildürülgen. Xitay nahayiti zor daghdugha bilen bashlighan "Bir belwagh bir yol" qurulushimu emeliyette xitayning iqtisad we herbiy kéngeymichilikidin bashqa nerse emes iken.

Doklatta bildürülüshiche, xitayning dunyagha xoja bolush qara niyitining yene bir ipadisi aldi bilen korona wirusini dunyagha tarqitiwétip, andin özini dunyani bu bala-qazadin "Qutquzghuchi" qilip körsitishi iken. Xitayning hindistan bilen toqunushi, teywen'ge tehdit sélishi, awstraliye, kanada we en'giliyege bésim qilishi qatarliqlar bolsa xitay hökümitining öz obrazi bilen hésabliship olturmay, öktemlik bilen dunya xojayinliqini talishishqa urunushi iken. Xitayning tibet we mongghullargha, bolupmu Uyghur musulmanlirigha qaratqan qebih siyasiti we ularning medeniyitini yoq qiliwétish jinayiti, xongkonggha élip barghan basturushi, xitay puqralirining erkinlikini cheklishi qatarliqlarmu xitay hökümitining qara niyitige nisbeten dunyaning diqqitini qozghighan weqeler hésablinidiken.

Doklatta yene tramp hökümitining xitayning bu qesti we yoshurun düshmenlikige qarita waqtida tedbir alghanliqi, xitayning sodisigha chek qoyghanliqi, korona wirusi mesiliside xitaygha yol qoymighanliqi, xelq'ara ittipaqdashliri bilen birlikte xitaygha qarshi birlik sep shekillendürüshke tirishqanliqi, "Magnétiski qanuni" ni yolgha qoyup xitay emeldarlirini jazalighanliqi, amérikadiki xitay küchliri we kungzi insititutlirini chekleshke ötkenliki qatarliqlar tilgha élin'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet