Xitay amanliq küchliri ilgiri bir qétimdila 17 neper Uyghurni étip ‍öltürgen

Muxbirimiz erkin
2021-08-02
Share

Xitay qoralliq saqchi qisimlirining qeshqerde turushluq bir alahide urush etriti Uyghur élidiki bir qétimliq weqede 17 neper Uyghurni biraqla étip öltürgen.

“Shinjang géziti” ning 2-awghust bergen bir xewiride bu qetli'amning melum bir yili 7-ayda yüz bergenlki ashkarilan'ghan, biraq uning qaysi yili, qeyerde yüz bergenliki, uning qandaq weqeliki tilgha élinmighan. Xitay da'irilirining Uyghur élide yüz bergen adettiki naraziliq weqelirinimu “Zorawan térrorluqqa” baghlap qoralliq basturidighanliqi we uninggha da'ir uchurlarni qattiq kontrol qilidighanliqi melum.

“Shinjang géziti” ning xewiride qeshqerdiki “Térrorluqqa qarshi turush xenjiri” dep nam bérilgen bir alahide urush qilish ottura etritining shu qétimqi weqede 17 neper atalmish “Zorawan térrorchi” ni bir qétimdila étip öltürgenliki, 121 kishini tutqun qilghanliqi bildürülgen.

Xewerde éytilishiche, bu etret 31 qétim atalmish chong kölemlik “Térrorluqqa qarshi turush urushi” gha qatniship hemmiside ghelibe qilghan we 180 nechche qétim mukapatlan'ghaniken. Ötken ayda xitay rehbiri shi jinping mezkur etretni xitay merkizi herbiy ishlar komitéti namidin mukapatlap, uninggha “Térrorluqqa qarshi turush xenjiri” nam bergen.

Shi jinping bu namni gherbtiki bezi döletler we teshkilatlar xitayni Uyghurlargha qarita “Irqiy qirghinchiliq” yürgüzüsh, “‍Insaniyetke qarshi jinayet” sadir qilish bilen eyiblep, bezi xitay emeldarlirigha émbargo qoyghan, Uyghur élide musteqil tekshürüsh élip bérip, “Irqiy qirghinchiliqqa” a'it xewer we delillerni éniqlashni telep qiliwatqan bir waqitta bergenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet