Хитайдики әң чоң телеграф ширкити болған "хитай телеграфи" ниң америка туприқида мәшғулат қилиш иҗазәтнамиси 15-декабирдин башлап тохтитип қоюлди. Америка федератсийә учур вә алақә комитети бу һәқтики қарарида хитай телеграфи ширкитиниң америка дөләт бихәтәрликигә сәлбий тәсирләрни пәйда қилғанлиқи үчүн бу қарарни елишқа мәҗбур болғанлиқини чүшәндүрүп өтти.
Хәвәрдә ейтилишичә, "хитай телеграфи" ширкити өткән 20 йилдин буян америка тәвәсидә учур мулазимити билән шуғуллинип келиватқан болуп, бу җәрянда хитай һөкүмитиниң тәливигә бинаән уларни лазимлиқ учурлар билән тәмин етип кәлгән. 2020-Йилиниң бешида хитай һөкүмити башқурушидики башқа үч телеграф ширкитиниңму америка дөләт бихәтәрликигә тәһдит пәйда қилғанлиқи үчүн тохтитип қоюлидиғанлиқи һәққидә агаһландуруш уқтуруши тарқитилған иди. Америка федератив учур вә алақә комитетиниң рәиси аҗит пай бу һәқтә сөз қилип "америка һөкүмитигә қарашлиқ бирнәччә министирлик хитай телеграфиниң дөлитимиз үчүн бихәтәрлик тәһдити болуватқанлиқи тоғрисида шикайәт қилди. Биз мушу сәвәбтин юқурқи қарарни алдуқ" дегән.
Хитай телеграфиниң америка туприқида учур мулазимити билән шуғуллинишиға берилгән иҗазәтни бикар қилиш чуқанлири бу йилниң бешида америка әдлийә министирлики вә башқа министирлиқларниң шикайәтлиридин йәр алған иди.
Мәлум болушичә, америка федератсйиә учур вә алақә комитети бу қарарни елиш билән тәңла йәнә хуавей ширкитиниң "биз америка үчүн дөләт бихәтәрлики тәһдити пәйда қилмидуқ" дегән мәзмундики әрзини рәт қилған.
- Беларусийәдә вапат болған абдурахман абдулниң аилиси хәвп астида
- Пәридә әмәтниң лагер сақчиси болғандин кейинки сирлиқ өлүми
- Ғәйрәт кәнҗи ишлигән "уйғур едит" ниң йеңиланған нәшри торға қоюлди
- Америка ташқи ишлар министирлиқи уйғурларни америкаға қобул қилинидиған мусапирлар тизимликигә киргүзгән
- Канада парламенти хитайниң уйғурларға қаратқан зулумлирини "ирқий қирғинчилиқ" дәп бекитти
