Xitay hökümiti Uyghur mejburiy emgiki üstidin tekshürüsh élip barghan xongkongdiki amérika shirkitini axturghan

Amérikaning xongkongdiki “Mintiz guruhi” namliq uchur meslihet shirkiti bu yil 3-ayda xitay dölet bixeterlik xadimliri teripidin axturulghan. “Asiya maliye” gézitining ashkarilishiche, “Mintiz guruhi” axturulushtin burun xitayning Uyghur rayonidiki mejburiy emgek zenjiri üstidin köp qétim tekshürüsh élip barghaniken. Xewerde, xitay bixeterlik xadimlirining ilgiri bu shirket bilen köp qétim uchriship, ularni shirketlerning mejburiy emgek bilen bolghan alaqisini tekshürüshtin saqlinishini, Uyghur éligha oxshash “Cheklen'gen rayon” din yiraq turushni agahlandurghanliqi, lékin bu shirketning yéqin'gha qeder tekshürüshni dawamlashturghanliqi bildürülgen.

“Asiya maliye” gézitining weqedin xewerdar kishilerdin neqil keltürüshiche, bu shirket ötken yili Uyghur mejburiy emgikige da'ir bir tekshürüsh doklati teyyarlap, özining tor békitide élan qilghan bolsimu, emma uzun ötmey bu doklat tordin éliwétilgen. Xewerde körsitilishiche, “Mntiz guruhi” ning xitay bixeterlik da'iriliri teripidin axturulushi, uning Uyghur mejburiy emgiki üstidin élip barghan tekshürüshi bilen munasiwetlik yaki emesliki éniq bolmisimu, lékin weqedin xewerdar kishiler xitay bixeterlik xadimlirining yéqinqi bir qanche yildin béri bu shirket bilen qerellik körüshüp, ularni shirketlerni tekshürüshtin yiraq turushqa agahlandurup kelgenlikini éytqan. “Mintiz guruhi” ning bir diréktori : “Ular bizge qaysi sahelerning cheklen'genlikini éniq éytip kelgen. Shinjang shularning biri idi” dégen.

Uyghur éli xitayning küntaxta bataréyesi we asasliq paxta ishlepchiqirish bazisi bolup, amérika hökümiti, bezi gherb parlaméntliri we xelq'ara kishilik hoquq teshkilatliri xitay hökümitini Uyghurlargha qarita irqiy qirghinchiliq yaki insaniyetke qarshi jinayet sadir qilish, Uyghur we bashqa türkiy musulmanlarni mejburiy emgekke sélish bilen eyiblep kelgen.