Американиң йеңи таможна беҗи лайиһәси хитайни техиму биарам қилмақта

Америка хитай маллиридин 10 пирсәнт қошулма таможна беҗи елишни йолға қойғандин кейин, йәнә бир йеңи таможна беҗи лайиһәсини оттуриға қойған. Униңда, америкаға импорт қилинған аптомобил, дора вә микро өзәк (чип) ладин 25 пирсәнт яки униңдин артуқ баҗ елиш бәлгиләнгән.

19-Феврал “җәнуби хитай әтигәнлик почтиси” гезитидә елан қилинған хәвәрдә дейилишичә, америка пирезиденти доналд трамп 18-феврал күни мухбирларға қилған сөзидә, америкаға импорт қилиниватқан аптомобиллардин 25 пирсәнт яки униңдинму артуқ баҗ алидиғанлиқини, бу арқилиқ ширкәтләрниң өз завутлирини америкаға йөткәп келишигә илһам беридиғанлиқини ейтқан. У бу йеңи таможна беҗини 4-айниң 2-күни елан қилидикән.

Хәвәрдә дейилишичә, хитайға селиштурғанда японийә, корейә вә явропа дөләтлири бу баҗниң тәсиригә бәкрәк учрайдикән. Һалбуки, хитай бу баҗиниң биваситә тәсиригә учримиған билән, васитилик тәсиригә учрайдикән. Чүнки хәлқара мал тәминләш зәнҗиридә хитайниң машина запчаслири муһим нисбәтни игилигән болғачқа, хитайниң бу саһәдики содиси зәрбигә учрайдикән. Дора саһәсидә болса, хитай билән һиндистан американи дора яки дора материяллири билән тәминлигүчи икки чоң дөләт болуп, униңдин 25 пирсәнт таможна беҗи елинса, хитайға зәрбиси техиму чоң болидикән.

“ройтерс агентлиқи” ниң хәвәр қилишичә, хитай тәрәп пирезидент доналд трамп 18-феврал дуня сода тәшкилати йиғиниға қатнашқанда қилған сөзидә оттуриға қойған таможна беҗини тәнқидлигән. Америка тәрәп буниңға инкас қайтуруп, хитайниң бу әйибләшлириниң сахтипәзлик икәнликини билдүргән.