Хоңкоңдики намайишчилар арисида хитай чоң қуруқлуқидин әвәтилгән “җидәлчиләр” байқалған

Мухбиримиз қутлан
2014.10.13

Хоңкоң намайишчилири билән алаһидә мәмурий район башлиқиниң диалоги мәғлубийәт билән ахирлашқандин кейин, хоңкоң оқуғучилири вә шәһәр аһалилириниң қаршилиқ көрситиш намайиши қайтидин әвҗигә чиққан.

Бирләшмә агентлиқниң хоңкоңдин бәргән хәвиригә қариғанда нөвәттә хитай чоң қуруқлуқидин хоңкоңдики намайишчиларға һәмдәм болуш үчүн келиватқан яшлар көпәйгән.

Вәһаләнки, мушу пурсәттин пайдилинип хоңкоң намайишчилирини қалаймиқан қилиш, намайишниң характерини бураш мәқситидә пәйда болған бир очум “җидәлчиләр” му оттуриға чиқишқа башлиған.

Улар “намайишчи” қияпитигә киривелип, кишиләр арисида җедәл теришқа, йоқ ишларни баһанә қилип намайишчилар арисида ихтилап пәйда қилишқа урунған. Йәнә бир қисим хитай чоң қуруқлуқидин кәлгән салаһийити намәлум кишиләр иҗтимаий таратқулар арқилиқ намайишчиларға һуҗум қилған. Улар “җуңгосиз хоңкоң бир күнму мәвҗут болуп туралмайду”, “биз силәргә йәткүдәк демократийә бәрдуқ” дегәндәк сөзләрни тарқатқан.

Хоңкоң сақчилири пәқәтла бейҗиң ортақ тилида сөзләйдиған “җидәлчиләр” дин бирқанчини тутқан. Хоңкоңдики намайиш тәшкиллигүчиләр намайиш тәртипини сақлаш вә хитай чоң қуруқлуқидин кәлгән “җидәлчиләр” ниң ариға суқунуп киривелишидин сақлиниш үчүн намайишчиларниң пәқәтла гваңдуң тилида сөзлишини тәләп қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.