Хуавей гуруһиниң уйғур диярида “рәқәмлик ташйол” қурмақчи болуши диққәт қозғиди

“хитай хәвәрлири тори” ниң 2-марттики хәвиридә ейтилишичә, хуавей гуруһи йеқинда “14-бәш йиллиқ пилан” ниң бир қисими сүпитидә уйғур диярида омумиййүзлүк “әқлий юқури сүрәтлик ташйол” қуруш һәмдә қатнаш кәспини “рәқәмлик башқуруш” қа айландуруш һәққидә уйғур аптоном районлуқ қатнаш назарити билән келишим түзгән.

Хәвәрдә ейтилишичә, даириләр уйғур дияридики “йол, адәм, машина, муһит” қатарлиқларни рәқәмлик башқурушқа йүксәлдүрүш арқилиқ буларниң бир-биригә болған тайинишчанлиқини техиму ашурмақчи болған. Хуавей гуруһиниң вәкили бу һәқтә сөз қилип, пүткүл қатнаш системисиниң рәқәмлик вә “әқлий юқури сүрәт” кә игә болушини “шинҗаңда юқури үнүмлүк вә бихәтәр болған қатнаш тори бәрпа қилишқа пайдилиқ” дегән.

Мәлум болушичә, хуавей гуруһиниң америка туприқидики җасуслуқ һәркәтлиригә һәмдә уйғур дияридики лагерлар қурулушиға ғайәт зор мәбләғ аҗратқанлиқи өткән йиллардин буян күчлүк тәнқидкә учрап кәлгән иди. Шуниңдәк уларниң уйғурларниң чирайини пәрқләндүрәләйдиған көзитиш аппарати ишләпчиқириши “ғәрәзлик һалда хитай һөкүмитиниң уйғурларни бастурушиға янтаяқ болғанлиқ” дәп әйибләнгән иди. Әмдиликтә уларниң уйғур диярида “рәқәмләшкән әқлий ташйол” қурулуши бәрпа қилмақчи болуши бирдәк хитай һөкүмитиниң техиму қаттиқ болған контроллуқ тәдбирлиригә маслишишни мәқсәт қилған, дәп қаралмақта икән.