Хитайниң йеңи партком секретари йеңи йилни уйғур елиниң ишләпчиқириш саһәсини тәкшүртүштин башлиған

Мухбиримиз әркин
2022-01-03
Share

Хитайниң өткән йили 24-декабир туюқсиз гуаңдуң ‍өлкисидин уйғур елигә йөткәп келинип, уйғур аптоном районлуқ парткомниң секретарлиқиға тәйинләнгән ма шиңруй, йеңи йиллиқ хизмитини уйғур елидики һалқилиқ ишләпчиқириш саһәлиридин тәкшүрүштин башлиған. У тәкшүрүштә ишләпчиқириш орунлириниң мулазимәтни сәрхиллаштуруши, сүпәтни юғури көтүрүши вә техника йеңилашни тезлитишини тәләп қилған.

Ма шиңрүй бир һәптә аввал уйғур елигә йөткилип келип райондики хитай кадирлириға ачқан тунҗи йиғинида вә арқидинла үрүмчи иқтисадий-техника тәрәққият районини көздин кәчүргәндә, муқимлиқ омуми нишан болсиму, бирақ хизмәтниң муһим нуқтисини иқтисадий тәрәққиятқа қаритидиғанлиқини ейтқан.

У, тәминат зәнҗирини заманивилаштуруш, хәлқара сода вә техника йеңилашни алға сүридиғанлиқини билдүргән. Бирақ мәҗбурий әмгәк вә лагерлар мәсилилирини тилға алмиған. Көзәткүчиләр, униң сөзи хитайниң уйғур ирқий қирғинчилиқ сияситидә түп өзгириш болмайдиғанлиқини көрситиду, дәп қариғаниди. “шинҗаң” гезитиниң ашкарилишичә, ма шиңрүй йеңи йил күни ‍үрүмчи юқири сүрәтлик төмүрйол бекити, майтағ нефит-химийә ширкити, шинҗаң тйәнли нефит-химийә пай чәклик ширкити, уйғур аптоном районлуқ җиддий ишларға тақабил туруш назарити қатарлиқ орунларни көздин кәчүргән.

У ‍үрүмчи юқири сүрәтлик төмүрйол бекитини көздин кәчүргәндә “адәм вә маддий әшяларниң бихәтәр, тәртиплик вә раван йөткилишигә капаләтлик қилиш” ни тәләп қилған. У тйәнли нефит-химийә ширкитидә қилған сөзидә, “ачқучлуқ техника тәтқиқатини тезлитиш, юқири қиммәткә игә йеңи материял вә йеңи мәһсулатларни тәрәққий қилдуруш, рәқәмлик өзгәртиш, әқлий иқтидарлиқ өзгәртиш вә юқири сәвийәлик тәрәққиятни тезлитиш” ни тәкитлигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт