Xitayning qaramayda 10 ming kishilik yer asti türme séliwatqanliqi ilgiri sürüldi

Italiyediki bir tor zhurnili xitay da'irilirining qarimay shehiride 10 ming kishilik yer asti türme séliwatqanliqini ilgiri sürdi.

"Zimistan" namliq mezkur diniy erkinlik we kishilik hoquq tor zhurnilining yerlik uchur menbeliridin igilishiche, mezkur türme qaramay shehirining gherbidiki ayköl su ambirida sélinmaqtiken

Xewerde, yer asti türmining yer yüzidin 5 métir chiqip turidighanliqi, yer asti chongqurluqi 40 métir kélidighanliqi, qurulushning 10 ming kishi patidighan qilip layihelen'genliki ilgiri sürülgen.

Xelq'ara axbarat wasitilirining yéqinqi xewerliride, xitay da'irilirining Uyghur rayonidiki yighiwélish lagérliri we siyasiy terbiyelesh merkezlirini kéngeytiwatqanliqini bildürgen idi.

"Zimistan" zhurnili yéqinda élan qilghan bir xewiride, xitayning doxturxana, zawut, mekteplerni mexpiy tutup turush orunlirigha özgertiwatqanliqi, bezi lagérlarda ademning köplüki tüpeyli tutqunlarning kariwitini teng ishlitishke, nöwetliship uxlashqa mejburliniwatqanliqi ilgiri sürülgen.

Yéqinda bir kishilik hoquq teshkilati rayondiki lagér we terbiyelesh merkezliride 3 milyondek kishining tutup turuluwatqanliqini bildürgen.

B d t irqiy ayrimichiliqqa qarshi turush komitéti yéqinda xitaydin bunchilik Uyghurni némige asasen tutup turuwatqanliqigha chüshenche bérishini telep qilghan idi.

"Zimistan" zhurnilining xewiride, qurulush ornining resimi bérilgen bolup, uning kirish ishikige "Qaramay sheherlik qamaqxanisini yötkesh qurulushi pilani" dep yézilghan. Resimde türme qorusigha bir qanche bina, ikki közitish munari sélin'ghanliqi, türmining üstidiki bosh yerge derex tikiwetkenliki körülüp turidu. Xewerde bayan qilinishiche, qurulush bu yil 10-ayda pütidiken.

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar