Qazaqistan Uyghur metbu'atliri zordun sabir tewellutining 80 yilliqini xatirilidi

Qazaqistan hökümiti teripidin iqtisad bilen teminlinip tarqitilidighan “Uyghur awazi” géziti sehipiside ataqliq Uyghur yazghuchisi zordun sabir tewellutining 80 yilliqigha béghishlan'ghan mexsus uzun bir parche maqale élan qilindi. Qazaqistanda tonulghan zhurnalist yadikar sabitof teripidin yézilghan mezkur maqalide bu yil zordun sabirning dunyagha kelgenlikining saq 80 yilliqi ikenliki we bu munasiwet bilen hazirqi zaman Uyghur edebiyatidiki meshhur namayende zordun sabirning hayat-pa'aliyetliri we ijadiyet méwilirini esleshning zörürlükini ilgiri sürülgen.

Yadikar sabitof maqaliside zordun sabirning barliq ijadi méwilirini eslep ötüp, uning “Ana yurt” trilogiyesige uning ijadiyitining eng yüksek pellisi süpitide baha bergen. Uning qarashlirigha tayan'ghanda, “Ana yurt” ning muweppeqiyiti 1944-1949-yillardiki milliy azadliq inqilab tarixini eng tesirlik we ré'al teswirlep, Uyghur xelqining tarixi éngini kücheytishte idi. Yadikar sabitof zordun sabirgha baha bérip, u:” özining nadir ölmes eserliri bilen xelqimizge zor meniwi ozuq ata qildi. U mutepekkur yazghuchi süpitide özining ajayip ötkür pikirliri arqiliq heqiqetni yorutup, qelbimizni meniwi nur bilen yorutqan dangliq qelem sahibi” dep yazidu. Zordun sabir 1937-yili ghuljida tughulghan bolup, uning “Abral shamalliri”, “Izdinish”, “Ana yurt” qatarliq bir yürüsh romanliri we köpligen powést hem hékayiliri neshr qilin'ghan. Zordun sabir 1998-yili ürümchide wapat bolghan idi.

Qazaqistandiki bir qisim Uyghur ediblirining éytishiche, hazir qazaqistanda Uyghur diyaridiki edebiyat bilen qazaqistandiki Uyghur edebiyat tarixini bir gewde nuqtisidin chüshinish, abduxaliq Uyghur, lutpulla mutellip, ömer muhemmedi, xizmet abdullin, ziya semedi, abduréhim ötkür, zordun sabir we bashqa chégraning ikki teripide ötken Uyghur namayendiliridin ortaq pexirlinish we ularni dersliklerge kirgüzüsh pikirliri kücheymekte iken.