Австралийәниң үч чоң шәһиридә «5-июл үрүмчи вәқәси» ни хатириләш намайишлири өткүзүлди

Мухбиримиз меһрибан
2018-07-05
Елхәт
Пикир
Share
Принт
5-Июл австралийәдә өткүзүлгән намайиштин бир көрүнүш. 2018-Йили 5-июл. Австралийә.
5-Июл австралийәдә өткүзүлгән намайиштин бир көрүнүш. 2018-Йили 5-июл. Австралийә.
Social Media

Дуня уйғур қурултийиниң чақириқи билән 2009-йилдики «5-июл үрүмчи вәқәси» ниң 9 йиллиқини хатириләш үчүн орунлаштурулған намайиш 7-айниң 5-күни җәнубий йерим шардики австралийәниң мелборин, адилайд вә канберра қатарлиқ үч шәһиридә тәңла өткүзүлди.

Австралийәдики уйғур тәшкилатлириниң мәлуматиға қариғанда, австралийәдә елип берилған намайиш, «австралийә шәрқий түркистан җәмийити» вә «австралийә уйғур җәмийити» қатарлиқ тәшкилатлар тәрипидин орунлаштурулған икән.

Австралийә пайтәхти канберрадики намайишқа «австралийә уйғур җәмийити» ниң рәиси мәмтимин әла әпәнди йетәкчилик қилған. Намайишқа сидний шәһири вә канберра шәһири әтрапидики уйғурлар қатнашқан болуп, намайиш канберра шәһиридики хитай әлчиханиси вә америка әлчиханиси алдида өткүзүлгән. 

Мелборин шәһиридики уйғур җамаитиниң намайишиға «австралийә шәрқий түркистан җәмийити» ниң рәиси нурмәмәт әпәнди йетәкчилик қилған. Мелбориндики намайиш 2018-йили 7-айниң 5-күни чүштин бурун 10:00 дин 12:00 гичә хитай консулиниң алдида, чүштин кейин 13:00дин 14:00 ғичә америка консулханисиниң алдида өткүзүлгән.

Мәлум болушичә, мелборин шәһиридики намайишқа адилайд шәһири қатарлиқ җайлардики уйғурлар айропилан вә аптомобиллар билән 10 нәччә саәтлик йолни бесип кәлгән.

Намайиш қатнашқучилиридин юлтуз ханим зияритимизни қобул қилип, мәзкур намайиш намда «5-июл үрүмчи вәқәси» ни хатириләш үчүн өткүзүлгән болсиму, әмма һаяҗанланған намайиш қатнашқучилириниң 2017-йилдин буян хитай даирилири тәрипидин түркүм-түркүмләп тутқун қилинип «җаза лагерлири» ға қамалған қериндашлири үчүн намайишқа чиққанлиқини илгири сүрди. Улар уйғурларниң әһвалини австралийә хәлқигә аңлитиш үчүн нәччә йүз километир йолни бесип намайиш мәйданиға кәлгән икән.
Адилайд шәһиридики намайишқа «австралийә шәрқий түркистан җәмийити уйғур тили мәктипи» ниң мәсули зулфийә абдулла ханим йетәкчилик қилған. Зулпийә ханим радийомиз зияритини қобул қилип, адилайд шәһиридики намайишниң мәзкур шәһәрдики җәнубий австралийә парламент бинаси алдида 7-айниң 5-күни пәйшәнбә чүштин кейин 1:00 дин чүштин кейин 3:00 кечә өткүзүлгәнликини, намайишқа йәнә парламент әзалар гурупписидинму вәкилләр қатнашқанлиқини билдүрди.

«Австралийә шәрқий түркистан җәмийити» тәрипидин йолланған намайиш нәқ мәйдани һәққидики синалғу көрүнүшлиридин мәлум болушичә, австралийәдики 3 шәһәрдә 7-айниң 5-күни бирла вақитта елип берилған намайишта 2009-йилидики «5-июл вәқәси» ниң 9-йиллиқини хатириләш билән бирликтә йәнә хитай даирилириниң уйғур дияридики аталмиш «тәрбийиләш мәркәзлири» намидики җаза лагерлириға қамалған уйғурларниң әһвалини аңлитип, тәшвиқат варақилири тарқитилған. 

Австралийәдин игилигән әһваллардин мәлум болушичә, бу қетим австралийәниң 3 чоң шәһиридә өткүзүлгән намайишниң тәсири чоң болған болуп, австралийәдики бир қисим таратқулар өз мухбирлирини намайиш мәйданиға әвәткән.

Мелборин шәһиридики намайиш қатнашқучилиридин «адилайд шәһиридики яшлар гурупписи» ниң вәкили изидин сөзлигән нутқида намайишниң мәқсити һәққидә тохтилип, австралийәдики хәлқ вә һөкүмәткә «хитай һөкүмитиниң 60 йилдин буян уйғурлар үстидин йүргүзүватқан таҗавузчилиқ зулумлирини аңлитилиш билән бирликтә ‹5-июл вәқәси‹ һәққидики тоғра мәлуматларни аңлитиш, болупму 2016-йилдин буян уйғур диярида 1 милйондин артуқ уйғурниң җаза лагерлириға қамилип әркинликидин мәһрум қилинғанлиқи, уларниң арисида мушу тапта мәйданда намайиш қиливатқан уйғурларниң ата-ана вә қериндашлириниңму барлиқини аңлитилған. 

Адилайд шәһиридики намайишчилар арисида тонулған сиясий паалийәтчи, 80 яштин һалқиған пешқәдәм шаир әхмәт игәмбәрди әпәндиму чақлиқ орундуқта келип қатнашқан. Әхмәт игәмбәрди әпәнди намайиш җәрянида өзигә берилгән сөз пурситидә 5-июл күнидики бастурушта ғайиб қиливетилгән көк кийимлик уйғур қизиға беғишланған шеирини оқуп бәргинидә, нәқ мәйдандики намайишчилар вә австралийәлик көрүрмәнләрниң көзлиридин иссиқ яшлар төкүлгән.

Пикирләр (0)
Share
Толуқ бәт