Абдувәли аюп делосиниң қәшқәргә қайтурулуп қайта тәкшүрүлүватқанлиқи мәлум болмақта

Мухбиримиз қутлан
2014-01-28
Share
abduweli-ayup-ailisi.jpg Абдувәли аюпниң аилиси. Америка.
RFA

Игилишимизчә, түрмидики яш тәтқиқатчи, тонулған тор язғучиси вә мустәқил маарипчи абдувәли аюп делосиниң йеқинда үрүмчи тәңритағ районлуқ әдлийә орунлиридин қәшқәргә қайтурулуп йеңиваштин тәкшүрүлүватқанлиқи мәлум.

Өткән йили 20-авғустта үрүмчидин әвәтилгән мәхпий сақчилар тәрипидин қәшқәрдики өйидин тутуп кетилгән абдувәли аюп 5 айдин буян из-дерәксиз ғайиб болған. Униң аяли вә уруқ-туғқанлири қәшқәр вилайәтлик сақчи орунлиридин тартип үрүмчидики түрмиләргичә қәдәр сүрүштүргән болсиму, лекин абдувәлиниң қәйәргә қамалғанлиқини биләлмигән.

"уйғурбиз" тори йеңи йил һарписида абдувәли аюпниң 2014-йили 1-айда сотлинидиғанлиқи һәққидики хәвәрни елан қилғандин кейин, бу учур көзәткүчиләрниң диққитини тартқан. Вәһаләнки, радиомиз абдувәли аюпниң биваситә туғқанлириға телефон қилип әһвал игилигән болсиму, лекин туғқанлириниң һечқайсиси униң қачан сотлинидиғанлиқи һәққидә ениқ уқтуруш тапшурувалмиғанлиқини билдүргән.

15-январ радиомиз абдувәли аюпниң хитай өлкилиридики мәлум университетта оқуватқан җийәни миршат билән телефон сөһбити елип барди. Миршат уруқ-туғқанлириниң үрүмчигә келип һөкүмәтниң мунасивәтлик орунлиридин абдувәлини давамлиқ сүрүштүрүватқанлиқини, лекин техичә униң һечқандақ из-дерикини алалмиғанлиқини баян қилди.

Аридин икки һәптә өткәндә, йәни бүгүн радиомиз йәнә абдувәли аюпниң һазирқи әһвали һәққидә униң туғқанлиридин учур игиләшкә тиришти. Телефон зияритимизни қобул қилған миршат тағиси абдувәли һәққидә 5 айдин буян тунҗи қетим йеңи учур аңлиғанлиқини билдүрди.

Униң баян қилишичә, 19-январ күни абдувәлиниң чоң акиси үрүмчигә келип укисиниң әһвалини сүрүштүргән. Он нәччә күн үрүмчидики һәр дәриҗилик сақчи вә һөкүмәт орунлиридин сүрүштүрүш арқилиқ, абдувәлиниң үрүмчидики мәлум түрмигә қамалғанлиқини, униң делосиниң йеқинда әдлийә орунлири тәрипидин қәшқәргә қайтурулуп қайта тәкшүрүлүватқанлиқи һәққидә учурға еришкән.

Миршатниң билдүрүшичә, абдувәлиниң чоң акиси шунчә тиришчанлиқ көрситипму абдувәли билән көрүшәлмигән. Һөкүмәт орунлири пәқәтла әдлийә тармақлириниң абдувәли аюп делосини сот қилиштин бурун қайта тәкшүрүш үчүн қәшқәргә чүшүргәнлики һәққидә қисқа учур бәргән.

Миршат зияритимиз җәрянида абдувәли аюпниң чоң акиси еришкән учурларға асаслинип, абдувәлиниң қәшқәрдә әмәс, бәлки үрүмчидә сотлиниш еһтималлиқи барлиқини илгири сүрди.

Тәпсилатини аваз улиништин аңлиғайсиз.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт