Rabiye qadir bashliq d u q rehberlirining yawropa parlaméntidiki ziyariti dawamlashmaqta

Ixtiyariy muxbirimiz ekrem
2017-01-26
Élxet
Pikir
Share
Print
Rabiye qadir bashliq d u q rehberliri yawropa parlaménti kishilik hoquq kéngishining re'isi panséri ependi bilen körüshti. 2017-Yili 26-yanwar, biryussél, bélgiye.
Rabiye qadir bashliq d u q rehberliri yawropa parlaménti kishilik hoquq kéngishining re'isi panséri ependi bilen körüshti. 2017-Yili 26-yanwar, biryussél, bélgiye.
RFA/Ekrem

26-Yanwar d u q rehberliri yawropa parlaméntidiki ziyariti dawamida besh neper parlamént ezasi bilen söhbet ötküzdi, ulargha Uyghurlarning awazi we teleplirini yetküzdi.

D u q rehberlirining yawropa parlaméntidiki ziyariti 26-yanwar chüshtin burun parlamént ezasi, yawropa birliki kishilik hoquq komitétining mu'awin re'isi barbara loh béhler xanimning qobuli bilen sa'et 11:00 da bashlan'ghan idi. Sa'et 12:00 din kéyin, qurultay re'isi rabiye xanim amérikidin yétip kélip, chüshtin kéyinki söhbetlerde d u q rehberliri bilen birge boldi.

Ular bügün, yawropa parlaménti kishilik hoquq kéngishining re'isi panséri ependi bashliq besh neper parlamént ezasi bilen uchrishish ötküzüp, Uyghurlar weziyitidin etrapliq melumatlar berdi. D u q rehberlirining bildürüshiche, uchrishishqa qatnashqan kishilik hoquq kéngishi re'isi we parlamént ezalirining hemmisila yuqiri derijilik erbablar bolup, yawropa birlikining xitay siyasitige biwasite qol tiqidighan shexsler idi. Bularning ichide, xitay terepning birqanche qétim Uyghurlarning ishigha arilashmasliq heqqidiki iltimasigha duch kelgen, parlaméntning ijtima'iy erkinlik, adalet komitétining mes'uli, azsanliq milletler guruppisining ezasi, "Uyghurlarning qedinas dosti" dep teriplinidighan sogor ependi, kishilik hoquq komitétining mu'awin re'isi loh bihlér xanim we yéngidin kishilik hoquq komitétigha re'is bolghan panseri ependilermu bar idi.

23-Yanwardin buyan, d u q rehberliri yawropa parlaméntining 20 neper rehbiri we ezasi bilen söhbetler élip bardi. Beziler bilen élip bérilghan söhbetler taki netijisi otturigha chiqquche sir halitide qalidighan boldi. Ete 27-yanwar chüshtin kéyin pa'aliyetler axirlashmaqchi.

Biz hazir, bélgiye paytexti biryusséldiki yawropa parlaméntida turup, bügünki we bu bir heptilik söhbetlerning netijisi heqqide d u q re'isi rabiye xanim, mu'awin re'isi ömer qanat we bash katip dolqun eysa ependiler bilen élip barghan söhbet xatirisini huzurunglargha sunimiz.

Toluq bet