Японийәниң бәш чоң шәһиридә хитайға қарши кәң көләмлик намайиш елип берилмақчи

Японийә уйғур бирлики тәшкилатиниң тор бетидики билдүргүсидә көрситилишичә, мәзкур тәшкилатниң тәшкиллиши билән 4-феврал күни японийәниң токйо, осака, фукуока, нагасаки вә окинава қатарлиқ шәһәрлиридики хитай әлчиханиси вә консулханилири алдида 1997-йили 5-феврал күни ғулҗидики уйғур яшлириниң хитай һөкүмитидин өзлириниң инсаний һәқ-һоқуқлирини тәләп қилип, тинчлиқ билән елип барған намайишиниң хитай қораллиқ қисимлири тәрипидин қанлиқ бастурулғанлиқиниң 20 йиллиқини хатириләш йүзисидин хитайға қарши кәң көләмлик намайиш елип берилидикән.

Бу һәқтә зияритимизни қобул қилған японийә уйғур бирлики тәшкилатиниң рәиси турмуһәммәт һашим бу һәқтә тохталди.

Окинавада елип берилидиған хитайға қарши намайиш һәққидә тохталған окинавадики японийә уйғур бирлики тәшкилати шөбисиниң мәсули тано марико ханим бу қетим намайиш һәққидә тохтилип: “окинавада илгири 5-июл үрүмчи вәқәси вә йәкән вәқәси қатарлиқ шәрқий түркистанда йүз бәргән қанлиқ бастурушларни хатириләш йүзисидин намайиш елип берилған иди. Бу қетим 5-феврал или вәқәсиниң 20 йиллиқини хатириләш мунасивити билән намайиш елип беришни тәшкиллидуқ. Мәқситимиз шәрқий түркистандики хитай һөкүмитиниң изчил елип бериватқан бастуруш сияситигә болған наразилиқимизни билдүрүш, 5-феврал или вәқәсидә өлтүрүлгәнләрни әсләш вә уларға һөрмитимизни билдүрүштин ибарәт” деди.

Японийәниң кюшу өлкиси фукуока шәһиридә елип берилидиған намайиш һәққидә тохталған японийә уйғур бирлики тәшкилати кюшу шөбисиниң мәсули имамура ноһ ибраһим бу қетим өткүзүлидиған намайишқа өзлириниң җиддий тәйярлиқ көрүватқанлиқини билдүрүп: “5-феврал ғулҗа вәқәсиниң 20 йиллиқи мунасивити билән фукуока шәһиридә тунҗи қетим намайиш елип беришқа тәйярлиниватимиз. Намайишимиз фукуокадики хитай консулханиси алдида елип берилидиған тунҗи хитайға қарши намайишимиз болғанлиқи үчүн, намайишни кәң даиридә елип беришни мәқсәт қилған һалда, шәһиримиздики кишилик һоқуқ тәшкилатлириниң әзалирини җүмлидин тибәт вә җәнубий моңғул кишилик һоқуқ мәсилилирини қоллиғучи достларни намайишқа тәклип қилип, улар билән бирликтә намайиш өткүзмәкчи. Ишинимәнки, тунҗи қетимлиқ хитайға қарши намайишимиз ғәлибилик болиду” деди.

Токйодики хитай әлчиханисида елип берилидиған кәң көләмлик намайишқа йетәкчилик қиливатқан такаши сато намайиш хизмәтлириниң мувәппәқийәтлик болуватқанлиқи тоғрисида тохтилип: “японийә уйғур бирлики тәшкилатиниң тәшкиллиши билән бу йил тунҗи қетим японийәниң токйо, осака, фукуока, нагасаки вә окинавадин ибарәт бәш чоң шәһиридә 5-феврал ғулҗа вәқәсиниң 20 йиллиқи мунасивити билән намайиш елип берилмақчи. Илгири 5-июл үрүмчи вәқәси мунасивити билән пәқәтла токйодила намайиш елип берилған иди. Бирақ, йеқиндин буян японийә уйғур бирлики тәшкилати һәр қайси шәһәрләрдә көпләп өзлириниң шөбилирини тәсис қилди. Шуңа буниңдин кейинки бу хилдики шәрқий түркистанда йүз бәргән қанлиқ вәқәләрни хатириләш намайишлирини японийәниң бир қанчилиған чоң шәһәрлиридә бирла вақитта елип беришни пиланлидуқ. Мәқситимиз, уйғур давасиниң японийәдә кәң көләмлик елип бериватқанлиқини хитай һөкүмитигә билдүрүш” деди.

Ахирида японийә уйғур бирлики тәшкилатиниң рәиси турмуһәммәт һашим японийәдә яшаватқан барлиқ уйғурларға 5-феврал ғулҗа вәқәсиниң 20 йиллиқи мунасивити билән мураҗиәт қилди.

Игилишимизчә, 5-феврал ғулҗа вәқәсиниң 20 йиллиқини хатириләш йүзисидин японийәниң һәр қайси шәһәрлиридә өткүзүлидиған намайишлар шу күни чүштин кейин саәт бирдин башлап елип берилидикән.

Юқириқи аваз улинишидин тәпсилатини аңлаң.