Канадада һөкүмитидин һүсәнҗан җелил мәсилисигә көңүл бөлүш тәләп қилинди

Ихтиярий мухбиримиз руқийә
2013-11-25
Share
Huseyin-Jelil-305.jpg Һүсәйин җелилниң түрмигә кириштин бурунқи сүрити.
RFA File

Канададики уйғур актиплири канаданиң юқири дәриҗилик һөкүмәт хадими билән учурушуп, уйғур мәсилисини аңлатти вә канада һөкүмитини хитай түрмисидики канада пуқраси һүсәнҗан җелил мәсилисигә көңүл бөлүшкә чақирди.

Бу пикир, мушу айниң 23-күни шәнбә канададики уйғур вә башқа инсан һәқлири тәшкилатлириниң вәкиллири көп милләтләр мәдәнийити министири тим уппал билән көрүшкәндә оттуриға қоюлди.

Бу һәқтә тохталған тим оппал әпәнди йиғинда оттуриға қоюлған тәләпләрни һөкүмәткә чоқум йәткүзидиғанлиқи вә бу тоғрисида бир гуваһлиқ йиғини ечишқа тиришип көридиғанлиқини билдүрди.

Бу қетимқи учришишқа уйғур канада җәмийити, әркин тибәт оқуғучилар уюшмиси, хитай демократлар тәшкилати, қатарлиқ тәшкилатларниң вәкиллири қатнашти.

Уйғур канада җәмийитиниң муавин рәиси адил аббас, министир тим уппаллға уйғурларниң сиясий әһвалини тәпсилий тонуштурди вә шундақла канада уйғур җәмийитиниң канада һөкүмитидин күтидиған тәләплирини оттуриға қойди.

Бу қетимқи учришишта һәрқайси инсан һәқлири тәшкилатлири тәрипидин тәклип қилинған, хитайниң зулумиға биваситә учрап канадаға қечип кетишкә мәҗбур болған шәхсләр оз кәчүрмишлирини баян қилип гуваһлиқтин өтти.

Әслидә, һазир хитай түрмисидә йетиватқан канада вәтәндиши һүсәйин җелилниң ханими камилә хенимму бу қетимқи учришишқа аилиси биваситә зулумға учриғучи сүпитидә тәклип қилинған болсиму, мәлум сәвәбләр түпәйлидин қатнишалмиди.

Адил аббас өз сөзидә һүсәйин җелил мәсилисини тилға елип, канада һөкүмитиниң дәсләпки вақитларда һүсәнҗан җелил мәсилисини чиң тутқан болсиму кейинки вақитларда унтулуп қалғанлиқини, буниң камилә ханимнила әмәс барлиқ канадалиқларни, җүмлидин уйғурларни қаттиқ үмидсизләндүриватқанлиқини, шундақла бу әһвалниң канада һөкүмитиниң абруйиға сәлбий тәсир көрситидиғанлиқини оттуриға қойди.

У ахирида мундақ деди: биз канада һөкүмитиниң һүсәнҗан җелил мәсилисини давамлиқ чиң тутуп җиддий бир тәрәп қилип беришини униң әркинликкә чиқиши үчүн бир һөкүмәтниң өз вәтәндиши өтәйдиған мәҗбурийитини чоқум ада қилишини үмид қилимиз.

Министир тим уппал, вәкилләрниң вә зулумға учриғучиларниң баянлирини көңүл қоюп аңлиди инкас қайтуруп мундақ деди: баянлириңлардин интайин тәсирләндим. Һәммәйләнниң авази мән арқилиқ һөкүмәткә чоқум йәткүзүлиду. Мән силәрниң мушундақ учришишни парламентта уюштуруп, инсан һәқлири комитетлирида гуваһлиқ бериш йиғини өткүзүш арқилиқ, пүтүн парламент әзалириға вә башқа министирларғиму дәрдиңларни аңлитишиңларни үмид қилимән.

Министир тим уппал, синг миллитидин болуп, канаданиң алберта өлкисидә туғулған. У техи бу йил 7-айда йеңидин коп милләтләр мәдәнийити министирликигә тәйинләнди.

Учришишниң ахирида тим уппал мухбирларниң хитай мәсилисидә бундин кейин қандақ пиланлириңиз бар? хитайға бесим қилишта содида һәмкарлиқниң үнүми бар дәп қарамсиз? дегән соаллириға җаваб берип, өзиниң хитайдики инсан һәқлири мәсилидә бүгүн тунҗи қәдәмни басқанлиқини, бундин кейин бу һәқтә техиму көп чүшиниш, илгириләш вә истратегийә оттуриға қоюшни халайдиғанлиқини билдүрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт