Ilham toxtining ayali érining dérikini qiliwatqanliqini bildürdi

Muxbirimiz méhriban
2014.01.16
Share on WhatsApp
Share on WhatsApp
ilham-toxti-guzelnur-woeser.jpg Ilham toxti ependi tutulup kétishtin ikki kün ilgiri, tibet ayal yazghuchisi wo'eser ilham toxti ependining öyige yoqlap kelgende chüshken xatire süret. Soldin onggha: ilham toxti, ilham toxtining xanimi güzelnur we wo'eser xanim. 2014-Yili 13-yanwar, béyjing.
RFA/Méhriban

15-Yanwar ilham toxti ependi tutup kétilip bir sotkidin kéyin, uning ayali güzelnur xanim radi'omiz Uyghur bölümining ziyaritini qobul qildi. U saqchilarning ilham toxtining késelchan anisini 15-yanwar kéche sa'et 10:30 da öyge ekélip qoyghanliqini, emma ilham toxti heqqide melumat bérishni ret qilghanliqini bildürdi. Güzelnur xanim yene özining ilham toxtini yéqindin bilidighan béyjingdiki bir qisim ziyaliylar we adwokatlargha hawale qilip, hökümet da'iriliridin ilham toxtining dérikini qiliwatqanliqini bildürdi.

16-Yanwar peyshenbe küni etigen ilham toxti ependining xanimi güzelnur xanim, ündidar alaqe tori arqiliq uchur bérip, ilham toxti ependi tutqun qilin'ghandin kéyin özining ilham toxti ependining iz-dérikini qilish jeryanidiki ehwallarni anglatti.

Biz güzelnur xanimdin ilham toxti ependi bilen bille élip kétilgen anisining ehwali we bu a'ilining nöwettiki ehwalini sorighinimizda güzelnur xanim munularni bildürdi.

Güzelnur xanim bayanida 15-yanwar küni yüz bergen ehwallarni anglitish bilen bille,ilham toxtining zadi qeyerge élip kétilgenlikini bilmeydighanliqini, özi we balilirining yenila öyde nezerbend qilin'ghanliqi üchün, sirtqa chiqish imkaniyiti yoqluqini, tünügün kéche sa'et 10:30 da saqchilar öyge ekélip qoyghan qéynanisining ehwali yaxshi bolmighanliqi üchün, özi we nareside ikki oghlining seher sa'et 2 giche uxlimighanliqi qatarliq ehwallarni bildürdi.

Güzelnur xanim yene bu qétim kelgen saqchilar we ularning qilmishliri heqqide toxtilip, saqchilar öy axturushi jeryanida, özi bilen saqchilar otturisida yüz bergen talash-tartishlar heqqidimu toxtaldi.

Güzelnur xanim,15-yanwar chüshtin kéyin öyge kirgen saqchilarning 40 etrapida ikenlikini ularning ichide yene Uyghur aptonom rayon da'iriliri ewetken saqchilardin 10 nechche kishining barliqini bildürüp, özining ular körsetken öy axturush qeghizige imza qoyushni ret qilghandin kéyinki talash-tartishlarni bayan qildi. U saqchilarning taki 15-yanwar kéche sa'et 10:15 ötkiche öy axturup, ilham toxti ependining kompyutéri, téléfon qatarliq uchur-alaqe wasitiliri, barliq matériyalliri, kinishka, banka kartisi, hetta öydiki aptobus kartisighiche bolghan barliq nersilerni 38 dane höjjet xaltisigha sélip élip ketkenlikini bildürdi.

Güzelnur xanim sözide yene, saqchilarning öy axturush jeryanida uninggha tutqan qopal mu'amilisi we qanunsiz qilmishliri üchün ularni eyibligenlikinimu bildürdi.

Güzelnur xanim saqchilargha dégen sözlirini bayan qilip, özining ilham toxtigha oxshash Uyghurlarning heqqini sözligen bir ezimetning ayali bolghanliqidin ghurur tuyidighanliqini, pexirlinidighanliqini we balilirighimu saqchilarning aldidila ularning dadisi ilham toxtidin pexirlinishini éytqanliqini bildürdi.

Güzelnur xanim söhbitimiz axirida yene munularni bildürdi: u da'irilerning ilham toxtigha oxshash xitayning qanun da'irisi ichide turup, Uyghurlarning qanuniy heq-hoquqlirini sözligen birini tutqun qilishining eksiche ünüm béridighanliqini, özining ilham toxti ependining dérikini dawamliq sürüshtürüsh iradisidin yanmaydighanliqini, xitay hökümitidin ilham toxti ependini tutqun qilishining sewebi heqqide éniq jawab bérishni telep qilidighanliqini tekitlidi. U dunya jama'etchilikini ilham toxtining ehwali we bu qétim tutqun qilin'ghan oqughuchilar weziyitige yéqindin köngül bölüshke chaqirghanliqini tekitlidi.

15-Yanwar küni ilham toxti ependi tutqun qilin'ghanliqi heqqidiki xewer tarqalghandin kéyin, ilham toxti ependini yéqindin tonuydighan chet'ellerdiki bir qisim mutexessislermu radi'omizgha téléfon qilip, özlirining ilham toxti ependining ehwaligha yéqindin diqqet qiliwatqanliqini bildürdi. Ularning ichide indi'ana uniwérsitétining proféssori élli'ot spérling ependi özining ilham toxti ependining béshigha kelgen qismettin epsuslan'ghanliqini we eng yéqin waqit ichide ilham toxti ependining ehwali heqqide yaxshi xewer anglashqa teshna ikenlikini bildürdi. Ilham toxtining amérikida oquwatqan qizimu radi'omizgha téléfon qilip, dadisi ilham toxtining héchqachan xitay qanunigha xilap ish qilmighanliqini, ilham toxtining peqet Uyghurlarning qanun ichidiki heq-hoquqlirini telep qilghanliqini eskertip, da'irilerni eng téz waqit ichide dadisi ilham toxtini qoyup bérishke chaqiridighanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet