Илһам тохтиға түрк дуняси инсан һәқлири әркинлик мукапати бериш қарар қилинди

Ихтиярий мухбиримиз әркин тарим
2014-10-29
Share
ismail-gaspirali-xelqara-insan-heqliri-erkinlik-mukapati.jpg "исмаил гаспирали хәлқара инсан һәқлири әркинлик мукапати" медалиони.
RFA/Erkin Tarim

Түрк дуняси журналистлар җәмийити тәрипидин тәсис қилинған "исмаил гаспирали хәлқара инсан һәқлири әркинлик мукапати" ни илһам тохтиға бериш қарарлаштурулди. Бу мукапат шимали сипрус түрк җумһурийити дөләт башлиқи дәрвиш әроғлу, қирим татарлириниң лидири мустафа җәмил қиримлиоғлу, әзәрбәйҗан парламент әзаси пашайева ханимға охшаш сиясәтчиләрдин башқа йәнә 7 яшлиқ уйғур муҗаһит қәшқәрлигиму берилидикән.

2014-Йили б д т мәдәнийәт, илим-пән вә маарип тәшкилати тәрипидин "исмаил гаспирали йили" болуп елан қилинғанлиқи мунасивити билән түрк дунясиниң һәрқайси җайлирида бу һәқтә һәр хил паалийәтләр өткүзүлмәктә. Бу мунасивәт билән түрк дуняси журналистлар җәмийити исмаил гаспирали илмий муһакимә йиғини чақирмақчи. Йиғин ахирида "исмаил гаспирали хәлқаралиқ инсан һәқлири вә журналистлар мукапати" тарқитилмақчи.

Мутәхәссисләрниң ейтишичә бу мукапат түрк дунясида тәсис қилинған хәлқаралиқ тунҗи мукапат болуп, бу мукапатниң илһам тохтиға берилиши алаһидә әһмийәткә игә икән.

Бу паалийәтни уюштурған түрк дуняси журналистлар җәмийитиниң рәиси гүнгөр арслан әпәнди йиғин тоғрисида мәлумат берип мундақ деди:
"2014-йили бирләшкән дөләтләр тәшкилати пән-мәдәнийәт вә маарип комитети тәрипидин исмаил гаспирали йили елан қилинди. 2014-Йили исмаил гаспиралиниң вапат болғанлиқиға 100 йил болған йил болғачқа қирим, түркийә вә башқа түркий җумһурийәтлиридә һәр хил паалийәтләр өткүзүлмәктә. Биз түрк дуняси журналистлар җәмийити билән бартин журналистлар җәмийити бирликтә исмаил гаспирали илмий муһакимә йиғини билән исмаил гаспирали инсан һәқлири мукапатини тарқитимиз. Бизниң бу йиғинимиз 10-айниң 30-31-күнлири түркийәниң бартин вилайитидә өткүзүлиду. Бу икки күнлүк йиғинда 19-әсирниң ахири 20-әсирниң башлирида қиримда яшиған бүйүк пәйләсоф, журналист, язғучи исмаил гаспиралиниң һаяти, идийиси вә униң түрк дунясиға көрсәткән тәсири тоғрисида мулаһизиләр йүргүзүлиду. Бу йиғин бартин университетида өткүзүлиду."

Түрк дуняси журналистлар җәмийити рәиси гүнгөр явузарслан әпәнди, бу қетимқи мукапатниң түрк дунясидин көп санда сиясәтчи, журналист вә зиялийларға берилидиғанлиқини баян қилип мундақ деди:
"исмаил гаспирали журналистлиқ вә инсан һәқлири мукапати тунҗи қетим 11-айниң 1-күни чоң мурасим билән берилиду. 2014-Йили берилидиған мукапатлар инсан һәқ вә һоқуқлири вә журналистлиқ мукапати. Бу мукапат бирләшкән дөләтләр тәшкилати пән-маарип комитетиниң ярдими билән әмәлийләштүрүлиду. Бу йилқи инсан һәқлири мукапати сипрус түрк җумһурийәти рәиси дәрвиш әроғлуға, қирим татарлириниң лидири абдуҗәмил қиримоғлуға берилмәкчи. Ирақ түркмән қурултийиға, әзәрбәйҗан парламент әзаси пашайева ханимға, сүрийә түркмәнлири миллий қурултийиға вә түрк дуняси үчүн қәләм тәвритиватқан көп санда журналистларға бу мукапатни беримиз"

У йәнә, түрмидә йетиватқан илһам тохти билән чәтәлдә шеир декламатсийә қилиш арқилиқ уйғурларни тонутуватқан муҗаһит қәшқәрлигиму бу мукапатни беридиғанлиқини баян қилип мундақ деди:
"хитайда түрмидә йетиватқан язғучи вә илмий тәтқиқатчи илһам тохти әпәндигә түрк дуняси журналистлар әркинлик мукапати беримиз. Һәммимизгә мәлум болғинидәк илһам тохти хитай зулуми астида яшаватқан уйғур түрклириниң һәқ вә һоқуқини қоғдиғучи муһим бир шәхс. Биз 4 яштин бери түркийәдә шеир декламатсийә қилип түркләрниң қәлбидә орун алған муҗаһит қәшқәрлигиму бу мукапатни беришни мувапиқ көрдуқ."

Бу илһам тохтиға берилгән иккинчи хәлқаралиқ чоң мукапат һесаблиниду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт